27.11.08

碎件

呢期寫文的意慾極低,搞到11月post文數量暫時係08年最低。。哎呀。其實有好多話想講好多事想寫,不過太細碎所以最後索性唔寫落去。咁唔係辦法,所以零碎就零碎吧。

碎件1:
早前有人知我有寫blog便奇怪我有咁好耐力keep住寫。。其實嘛,以前有寫日記的習慣,所以現在寫blog對我真係無難度。而且,日記寫的東西往往太沉重,太多是非,又太縱情縱慾,無哂自律,對個人始終不太好。寫blog就不同了,但求抒發心情,吹吹水,風花雪月,有交流〔因為是公眾平台,所以又要自律〕,很爽啦。是了是了。真的很久沒寫日記了。。這年頭,連罵人也要不想收埋收埋。

碎件2:
的確,呢期個人「好奄悶」,有點「滯」。。不想出街見人,又不想呆在家冒菇〔雖然應該有很多家務事要做〕,書又睇又唔睇,家課又伸埋一邊,成日都唔知自己想點,亦無什麼事令我情緒向好方面高漲。。唔知係係咪個悶樣出哂面,或是少喝水導致嚴重「肌渴」被大家發現,所以久不久有好心人就叫我搵搵愛情滋潤一下。。
總言之,我要說,我的心事,你們又怎會兩眼望穿。嘿嘿嘿。

碎件3:
睇新聞覺得那些泰國人很笨。。封堵機場就如願以償?真係天真到我失笑。
但向示威的人士開鎗,卻實太過份。
泰王你又去左邊?

碎件4:
政府不要出消費券。這是無謂的事。目前是循環系統出現問題,各行各業環環緊扣,周轉不靈少生意少客追唔到數不是一兩個行業的問題。那700萬張消費劵拋出市場根本唔會令整個大環境變好。我阿媽同我都話,一劵在手,咪拎去買糧囉,唔通真係會拎去買個手袋或者出埠玩樂咩。我估計過大半數的香港人都會咁用啦。咁,我們更加無理由挪用公帑供養某批人的口袋吧!

碎件5:
阿扁呀,你真係好命,明明你禽獸不如都有班傻人仍然仆心仆命支持你。那些捧你的在我眼中絕不是愚忠,而是徹底的傻民啦。你大概真係需要出來講聲「多謝中國!多謝共產黨!」。可惜,班傻民做咁多事吵吵鬧鬧都撼動不到你的良知,你到現在仍沒有覺醒半分,也從沒有感到慚愧,反而厚顏地利用他們的傻痴痴去「肯定自己無幹過錯事」。。明明道德淪亡,明明敗壞社會風氣,但你依然裝出一臉理直氣壯,真係難以想像。
你會不會把自己「神化」了?
阿珍呀,傷殘唔係大哂。恃住身體缺憾便順便扭曲埋心理,恃弱不禁風就拖延審訊查問,咁搞法搞到幾時先畀我見到你及一家大細被送入大牢?還有,你唔好劑劑出鏡都擺出一副孱弱可憐樣,真係作嘔。你既然有力氣扣咁多金銀珠寶上身炫耀反而無力落口供。。真係要多謝文明和法律令你順利變成妖怪姥姥。
阿妤:你係孩子老母,你咁樣,點導育下一代有正直光明的人格?
好煩呀,你呢一家人!

碎件6:
光緒皇原來係急性中劇毒死。究竟,佢係阿蓮英做低定係被阿世凱買起呢?這會不會永遠是個謎呢?光緒明明係皇帝,但條命都算苦,本來經已成個孱仔相,連官方畫像下都沒有留下挺拔的一面,真係好愁。再睇阿慈禧同幾個光緒妃嬪的黑白照片,那些妃子好似《大內密探零零發》內的三千後宮,甩甩漏漏,搵件有琴操上下或一半質素都無囉,真係可憐。至於阿慈禧,張張相都係老虔婆年紀,唔知佢未入宮仍被嗌杏兒的少女時代,會是什麼模樣?想必不會似我,細細個就一把臭臉。嘿。

碎件7:
朋友在blog內形容我係一個捨得食又喜歡周圍食的人。這個我同意。可為美食拍照存檔,為整件事推波助瀾囉。

碎件8:
在天水圍西鐵站被攔住做了一個超低智的問卷調查。簡直答到火起三丈。有一題是這樣的,你從哪個站上車,九龍站。中途有沒有轉過車?是什麼站?當然我可以經荔景再落美孚轉車,或在九龍站到南昌站轉車,但弄條這樣素質的問題會不會很無聊?到後來,有一題問我知不知道這一程搭了多少錢。我直說不知道。點解?我咪話『我都未出站點知八達通回程優惠後會扣幾多!』
不知有幾多人做過呢份無聊又無邏輯的港鐵問卷調查。。

碎件寫到這裡打住。擇日再續。

24.11.08

為何要我遇上你

中國人話,咖啡對身體唔好,雖然公司長期有星巴克咖啡供應,不過我已由最初好口痕一日兩三杯遞減到一杯都唔飲。數數都維持了兩個月咖喇。當然指在公司內啦。在街外,都有喝過咖啡,就在BURGER KING那次跟早餐。不好喝。。當然,街店的咖啡水準其實不太穩定,所以很多時候倒掉比喝掉的多。
那天早上去了土司工房叫了個5號餐,咖啡或茶。。不想喝奶茶,所以又點了咖啡。一試就愛上。這種馬來西亞咖啡,真係又香又滑又好味。。這是我想要的味道。喝著,感覺好幸福呀,好滿足呀!
大概,為了這杯咖啡,我會多了去土司工房。。

吃了一頓好味火鍋


因為早前手痕把文上載到UFOOD,一文不能兩登喎,所以這篇文被要求執過。咁煩咖。
原文可以去ufood找啦。以下是我重寫的為食記。拉長點先。

雖然香港人去打邊爐幾乎無分季節無分時候,但帶著點點寒意去火鍋過是氣氛比較好。慶幸身邊都有班熱愛打邊爐的同事,嗌咪都易好多。那天和同事們一行共15人去佐敦吳松街合興打邊爐。原本計劃過去金牌打邊爐,不過太遲數齊人數,所以到訂位時金牌那邊已full哂。又有諗過去某間中日火鍋,不過有同事食過話唔得。反而提議我們去合興火鍋。反正都未去過,又有同事推介,咪轉場食火鍋。合興地下連閣樓的舊式老店,根本沒有一張大檯容得下十五人,所以我們被分成兩桌火鍋。閣樓地方狹隘,我們幾乎擠在一起打邊爐。如果多掛幾件大褸,真係仲擠呀。。多謝同事介紹,這火鍋店的火鍋料皆是水準之作!我們大家都很滿意!

火鍋料的選擇不多,比其他火鍋店的選擇算是少得可憐,可是食物新解美味,所以我們都不介意再三order同一款食物。這間小店,有幾樣食材一定要吃:

蝦丸:原以為是慣常見到的那種一顆顆白色蝦丸,上桌卻見是新鮮蝦和蝦膠混黏而成的丸子。每顆半透明狀蝦丸子也呈淡紫色,對我來說這個賣相真係好唔得咖。。不過灼熟後放入口,卻發現這才是人間美味!真係勁彈牙勁新鮮勁甜!鮮蝦的香味久久不散,七十幾蚊碟的蝦丸叫了3碟。抵食呀!畢竟是鮮蝦打成的丸子!
牛肉:我們這一桌點的是HK$208一碟的肥牛。故又名208。牛肉新鮮到有好濃的肉味,咬落有筋卻無損整體高質素。。於是,我們再三回味,前後叫了回味了4碟。哈哈哈。
鮮制生牛丸:都係第一次見到有「生牛丸」。。經店內職員所教,灼20分鐘才熟透吃得。口感絕對跟一早製好的雪藏牛丸係兩回事。。這個生牛丸真係勁鮮味。一吃必定愛上它的鮮!
牛柏葉:再次經店內職員所教,牛柏葉落湯灼幾下就可食。。真係爽脆到爆!不過成碟牛柏葉白雪雪反哂光,應該都漂得都幾勁。。最好笑係我們一見到碟白到反哂光的牛柏葉,突然問點解唔叫原本黑色的牛柏葉,個店員就話有牛柏葉原本係灰黑色啦〔我們都知啦〕,『但我地無賣』。。真係吹漲。
墨魚滑:一沱白漿似的上碟,沒有竹筒,也沒有一片菜墊底,完全不花巧。當然賣相絕不討好啦,一沱喎。。但食落真係好彈牙好新鮮。
牛柳粒:一埋位就order了一碟,無拍照就被我們撥哂入鍋灼。。138元碟的牛柳粒好嫩好有肉味又好多汁。正!
生蠔:無理由食火鍋唔叫生蠔。。灼熟後仍斤兩十足。勁新鮮勁大隻。。
這一晚,我們還有點了桂花蚌、金菇牛肉餃〔其他地方未必食到!〕、炸魚皮、水餃〔都係新鮮蝦搞到咁好味〕、蟮片〔我唔食蟮,同事話好好味〕。。。回想,整晚都係肉,完全無柯打過任何蔬菜囉。簡直忘記了呢個世界係有蔬菜。。
由7點開始打邊爐一直踩到10點埋單,檯面大部份時間都係「無食物」。。那些一碟二碟一上檯就掃哂入鍋裡面,係refill個湯時才有時間畀我拍番張相。。又唔知點解,呢一餐食極都唔覺飽。。在酒酣耳熱過後,我們這一檯埋單竟要2750!〔鄰桌的同事埋單只係千幾元。。睇來我們這一桌真係食得勁開心!〕最狼狽係,我們之前無問清楚搞清楚,原來此店只收現金!大家慣了一個人碌卡第日再計數突然要「現兜兜」都非常慌亂。根本有些如我咁個荷包長期都無乜幾多現錢傍身。。於是,整桌人狼狽地倒哂荷包裡的紙幣出來湊湊睇睇夠唔夠數。核突到連廿蚊都拎埋出來找數。。終於,邊笑邊湊,加上鄰桌同事仗義地借出100元才籌夠數埋單救走自己,不必要人出去ETC提錢救火救人。。離開時,見到阿姐佢忙著點我們一疊小面額鈔票,都好好笑。。
吃了一頓好味火鍋,真係好好好好爽。

20.11.08

Tropic Thunder

在《Burn after reading》裡Frances McDormand在戲院內吃爆谷的模樣,我想起早前抱著一個爆谷餐睇《雷霆喪星》的情況。當然,電影裡McDormand中女之意不在手,而是旁邊一起為劇情開懷大笑的男人。是真笑又好,假笑都好,只要男人有笑。而我,是一個人入場笑笑笑啦。

因為同期也看了電影主題都是戲謔娛樂圈,講娛樂圈血淚史瘋狂史的《DMC》。但比較之下這一套戲確不及《DMC》好笑。

無論Ben Stiller有幾紅,或我之前入場睇過他幾多次戲,到現在,都無法說喜歡這位荷里活紅星。我都係為了睇Robert 和 Jack 才入場。。

18.11.08

Burn after reading

〔含電影內容〕

電影港譯為《CIA光碟離奇失竊案》,不懷好意地笑了個多小時。戲院場內笑聲此起彼落,大家都很喜歡高安兄弟的劇本。沒法子不懷好意笑,因為電影中那些笑料如果切實地發生在自己身上,一定笑唔出。畢竟,劇中人個個自恃聰明以為控制了大局卻不知事情發展到不可收拾的地步。其實個個都鱷魚頭老襯底,又傻又天真。
電影一開始由John Makovich 飾演中情局分析員Osbourne Cox以奇怪原因被無理調組開始。中年男一時火遮眼劈炮唔做長糧無哂遣散唔要諗住靠老婆份長糧一起過日子,其間忽發奇想打算在這段時時寫本回憶錄賣個滿堂紅。勢利老婆Katie〔Tilda Swinton飾演〕又怎願跟個不認為自己係失敗者的老公同甘同苦分埋身家,在律師的指示下暗中取去丈夫的銀行戶口記錄來個身家大起底方便離婚不用負擔贍養費。其實,Katie又想同鹹濕的已婚情夫Harry Pfarrer 〔George Clooney飾〕名正言順一起。一次冒失,那隻連部份回憶錄草稿的光碟遺留在健身中心。。
當健身中心教練Chad Feldheimer〔Brad Pitt飾〕及職員 Linda Litzke 〔Frances McDormand飾〕兩人發現這隻光碟後認為是國家的重要機密文件,歪念頓生。Linda正巧急於撲水幹她的「希望工程」,於是聯手一起向躁底的Cox「求財」。。

電影想諷刺無論在這個地球上只要是人類,不論在任何地方都有笨人幹實事的情況〔現實中,布薯何不是堂堂一位大國總統〕。還有想帶出人類思考的奇妙。幼稚起來真係會幹盡幼稚的事。三個臭皮匠未必出到一個諸葛亮。看為啖氣憤然辭工死要面其實被人睇穿是遭踢走暗下恥笑:見到一列列莫明奇妙的符號資料就當係國家最高機密的天真男;以為改頭換面就可從過新生愛情幸福一齊來,以為老婆唔知自己有外遇其實老婆已備好過牆梯隨時走佬;擔心她上網結識異性會遇到濫交者誰知女人心裡另有所求;當然故事中為了錢為了啖氣而走去出賣國家惡向膽邊生挺而走險變成盜賊貪求更多更是瘋狂無知。我們就是這樣以為自己想的一套是正確堅實,累了自己也害了人。我們,查實也是一樣對世事抱幼稚天真的態度看。當局者迷,旁觀者清,看電影到最後CIA內二人的對話及對整件事的處理手法,才知旁觀者原來也是當局者之一。誰肯定入到CIA工作的人心智行為一定正常過正常?於是,記憶突然冒起,想到那個已婚的女太空人穿上紙內褲連夜穿州過省為了除去情敵的事件。。不是一樣奇妙兼充滿戲劇性嗎?

睇電影,對「人要衣裝」加了肯定,真是珍珠都無咁真的至理名言。
看Brad Pitt的造型,無哂星味,且言談間又充滿無知,幼稚天真,真係殺死人。
看George Clooney的高腰牛仔褲有點肚腩外加埋鹹濕的中坑look,真係嚇到唔認得。
齋睇當今演藝界兩大超型佬在電影中的超平凡超樸實造型,就知「裝扮」其實對每一個人係幾咁重要。嘩哈哈哈。
一件跟電影無關又有關的事,是發現變了中坑John Makovich個款竟和自己舅父好似樣,一個肥版一個瘦版,一個外國人一個中國人。。連性格都有點相似。睇《John Makovich》時John Makovich還年輕,一點都不覺咖。。嘿嘿嘿。

17.11.08

蛋蛋變了雞仔.奇聞



7號那天早上,帶蛋仔去診所見醫生,醫生都係要蛋蛋留下來做全身麻醉洗乾淨耳道內的污物。由於醫生話貓耳很少會受感染如此,所以提議在手術期間給牠照張x-ray睇睇有沒有異常。除此之外,加一個驗血,畢竟貓貓的年紀也有咁上下。。
儘管已有心理準備那朝並無畀蛋蛋食早餐及餵藥,我們還是不情不願留牠在診所洗耳。
差不多晚上七點才見到醫生和蛋蛋。洗完耳的蛋蛋已沒有反出第三眼,可是神情又呆又累。因為未見醫生,未能抱牠回家。蛋蛋的x-ray 好明顯見到一邊內耳發大,醫生跟我們說這是中耳炎。因為發炎所以耳朵才不停有耳垢。解決方法係開刀。不過不擔保不會再復發。。由於醫生話佢無fix這個病的經驗,所以佢會問診所的另一位有貓專科醫生的意見,睇睇有無可能唔開刀都有辦法根治牠的問題。
我直說,如果開刀後都唔擔保完全斷尾,我為何要令貓受此一刀呢?
不過隔幾個月要帶佢洗一次耳,對人對貓都好傷。佢受得幾多次全身麻醉喎。。而我跟牠的良好關係,總是一次又一次背叛牠而令他避開我呀。

突然間蛋蛋變成長期病患貓。囧。
於是,我便等待診所的回覆囉。。

那天接回蛋蛋回家後,蛋蛋繼續呆,連叫聲也沒氣沒力。我媽話佢道麻醉藥未散頂著喉嚨,我咪話整個檸檬畀佢嗅一下做完嘔嘔蛋便精神哂啦。後來,未嘔嘔蛋未成卻發現佢「lai s」蛋。。最鑊係「lai」了兩次!第一次發現時原來我件衫已沾了便便,第二次再發現,大概真係麻醉藥太勁令貓乏力便便,明明蹲在沙盆中,便便還是由肛門直流到落腳跟,加上同一時間又趕住轉身嘔吐,於是慌忙下踩到一腳都係稀爛的便便。蛋蛋跟我們一起慘叫。由於細佬沖緊涼,大清洗之事便要在廚房進行。於是我媽擱起一條腿托住貓,我就抄底抱著牠捉實牠對腳方便阿同佢洗屁股剪毛兼唔好用屎腳踢到我們。。臭到想嘔都要頂硬上,我媽話鋅盤用來洗屎諗起真係想嘔,我叫佢唔好諗太多啦。如果在廁所瓷盆搞咪仲想嘔,放水洗面嗽口都在瓷盆呀。明明環境好噁心,但係蛋蛋仔若無其事地乖乖不扭計在等,我們都忍不住笑。
不過,我媽話我做乜嗌隻貓做「屎屎蛋」,搞到牠屎屎上身。。於是,我應承唔再嗌貓做「屎屎蛋」。。莫非又是詛咒?
抱住隻18磅貓折騰一大輪,加上我一隻手不可持續拎重物,未放低佢都已累透。。
那一晚,嚇到我媽唔敢入房睡覺,驚肥仔蛋半夜又來一餐搞到成廳都係。。

嘔又嘔過,蛋蛋把聲仍然未回復囉。起初是張口無聲,啞貓?〔唔通插喉時弄傷了聲帶?〕,後來有聲卻是雞仔聲,每回叫嚷都又尖又高〔都係懷疑聲帶被刮損〕。。簡直是一隻雞仔的叫聲。好怪又好笑。。一聽到佢把雞仔聲就哈哈大笑。。

幸好差不多一個星期後終回復正常聲線。

關於牠的驗血報告嘛。。簡直好笑。所有都在正常水平。最緊要係腎無問題,肝亦都無異樣。以牠食慣長糧又愛食得肥膩脂肪多,膽固醇又高的肥貓來說,驗血報告合格簡直匪夷所思。都好,我確放了心。真係好擔心佢長期偏肥會有暗病咖。

等了一星期,診所那邊仍沒有回音。是時候主動打去問個究竟,或取回牠的病理記錄及x-ray照去另一間獸醫診所醫治。我相信,有不用開刀的解決方法囉。

黃酒小菜有幾碟


這陣子,口痕玩飲酒。

早前整理家中酒櫃,抹塵啦〔有打算打劫其中一支酒去朋友的house warming。。哈哈〕。由於老豆飲酒的quota 用光,所以近幾年除了大節日都無乜動過酒櫃裡的酒。最荒謬係阿妹送的養命酒都有三支〔簡直拎去送禮佢都唔覺〕。在幾十支酒裡頭,發現老豆有支市價4舊左右的茅台酒。由於用蠟封了口,所以我明明想試都唔敢試。於是,咪身痕自己走去買酒囉。買酒之前,在酒櫃中的確有另一個發現,就是有支及牌蘋果醋渾水摸魚站在群酒中間。大概係老豆見到支醋個樽成支「長頸」咁就誤當是酒咁放埋入櫃啦。既然有所發現,我跟媽兩條友便毫不客氣地開了支醋飲。晚晚飲半杯飲了成個星期,才發現支醋早已過哂期。阿媽知道後,趁我唔為意竟將餘下的四份一倒掉。。好可惜。真係好好飲。

買酒的心一起,唔買支酒係唔安樂。咁,買什麼酒好呢?二鍋頭?蘇格蘭威士忌?清酒?嗯,不如花雕啦。呢期成日見到「花雕醉雞」幾隻字,但又不能吃好好味的花雕醉雞,只好剩飲花雕咯。

那天在超市買酒,有位叔叔見我拎住兩支花雕酒研究,於是給我溫馨提議,叫我買八年花雕〔加飯酒〕。我見佢手持是三年花雕,於是反問他你都係拎住三年,點解叫我買八年?他說八年花雕早前才買過。今回再來買三年的。回到家把酒倒出來,才發現酒色泛黃〔花雕不是色如白酒的嗎?〕,初入口完全感覺不到花雕的味。放久了,才嗅到熟悉的酒香。不過大陸酒的味道真係要時間適應和習慣。後來跟同事說起,他們說這是黃酒啦。而且,他們說應該買十五年以上的陳年花雕才香醇好味。。
雖然一支花雕只賣三十多元。。但開了就要清哂佢。晚晚喝一點才睡,酒量淺的我的確睡得穩。哈哈哈。
下次經過國貨公司或南貨舖,再買十五年陳年花雕喝吧。

下次,我都想買清酒試。

圖:後來阿媽買回來畀我飲的醋。不過我還是喜歡喝蘋果醋多點,我喜歡那果香。

14.11.08

Body of Lies

一邊看Ridley Scott 的《叛謀同謀》,一邊感到心痛。當然不是因為見到「應該係好型」的 Leonardo DiCaprio & Russell Crowe同時都走哂樣啦。我都唔係為了睇靚仔靚佬而入場耶。
我是為現實中同樣被國家安排,每個以身犯險的行動都好像是為了整個世界和平的那些工作人員如Leonardo DiCaprio飾演的Roger Ferris感到心痛。點解要留在中東地區幹著朝不保夕的間諜 / 特工?什麼驅使他還要日日提心吊膽的為國家幹賣命卻愚蠢的事。
Russell Crowe飾演的Ed Hoffman真係勁討厭,安然坐在美國的溫室中,遙控〔老點〕下屬這樣那樣,視其他人命如草芥,過程中無辜死的只要不是美國國民就抱你死你事的心態。而且落任何決定也覺得完全「政治正確」,不必反思。一切行動都以美國的利益為大前提。這種輕視他國的無知大美國態度跟布薯真係無分別。睇到好肉緊的我,真想一拳打爆佢。
無奈又痛心的是,現實中大把這樣的白痴在「維護世界和平」,卻不知把簡單的事情越搞越糟。
後來,朋友問我電影好看否,我說好看呀。至少我知道套戲講什麼。記得有回睇《油激暗戰》,對世界政經界不太了解的我除了知道美國覬覦可油出產國外,對故事所指所涉及的現實狀況全不理解,所以睇到搲頭。
同樣,我心痛,是對世界的無知,等同在溫室的人。這算不算是這電影給我們的反思?

Synopsis: http://www.imdb.com/title/tt0758774/synopsis
Review – The New York Times: http://movies.nytimes.com/2008/10/10/movies/10lies.html

13.11.08

關於入場前的食食食事

那天下午因為開場前趕不及去食食食,加上連看兩場電影,連早餐其實也未吃的我只好抱了個爆谷餐入場。一個女生消化了大半筒爆谷,這才是「超肥」!由於The Grand 賣的熱狗包裝不太好〔對我來說〕,我總是把醬汁搞到甩甩漏漏,面又有手又有。。所以明明愛吃熱狗的我只好轉吃爆谷。不過嘛,這間戲院的熱狗貴得來又不太好味。。算罷。

有一回看電影,揀在千兩迴轉壽司吃點什麼,因為一個小時內可塞飽自己,快靚正嘛。但order了一客壽司等了很久都未上,催上桌也催埋單,唔趕埋單睇戲的終也等到變趕埋單睇戲。。狼狽呀。

距開場只有一個小時,可是這天我們一行六人還是去了APM 的 Shakey's Pizza 吃個又快又飽。
幸好,真係好快上桌。
因為人多,所以點了一個四人餐和一個二人餐。。在一個小時內狂風掃落葉把碟子上的食物填裡肚子。。哈哈哈。。這間店食品有水準,牛尾弄得不錯丫,pizza也好味,意粉也煮得恰好,沙律的菜也很鮮。

不過,去餐廳,我還是希望舒舒服服的坐,慢慢地品嚐每樣菜式的味道。

12.11.08

Lunch & Dinner


午餐 @ Habitu
王家沙太多人,於是去了Habitu食晏。。如果不是要看電影,這裡真可hea一個下晝。
千層麵好好味。。飽飽。

早餐 @ Burger King
揀個無乜客的位置。。咬牛角包。

Dinner @ Cafe Eos
法國田螺香草意大利麵橄欖油太多。
南瓜湯味道怪了點。應該不是用「用來煲湯」的那種南瓜。。

唔會再去的茶餐廳 @ 元朗。。
點解上海排骨麵會有咖哩味?我要傳統味囉。

11.11.08

Quantum of Solace

電影中途,發現在party中邦女郎身穿的那襲裙子,和Michelle Obama陪丈夫上台發表勝利演說那被人彈到一文不值著錯哂那banana republic〔如無記錯牌子名〕的同款不同色系的作品。Michelle 穿的是黑紅,邦女郎的是銀黑。如果沒有認錯的話。
為什麼我會專注這些事情呢?一,一”

上一輯新007仍未看。。卻跑到戲院看2。007條女點死點樣出賣佢乜都唔知。。一開波就好似甄子丹上身不停埋身肉博打打殺殺,不停爆缸。。比舊007更似一個特工。。
苦情到呢。。都唔知佢做人做到咁苦其實為了什麼。。

是一套單純到不必用腦思考的動作片,不知有啥內涵。。有無人講到畀我知套戲的「深度」是什麼?

特別去elements睇套戲諗住有震震椅,點之唔震。吹脹。

10.11.08

【武道狂之詩.卷一】


雖然話要忍手唔好買書住,不過上星期二去三聯買雜誌,見到喬靖夫新書【武道狂之詩.卷一.風從虎,雲從龍】上架,急忙拎本去cashier畀錢。
這幾天,多留在家看顧病貓,所以以很短的時間看畢整部卷一。很久沒有看過好看又緊湊的小說!想想,自從九把刀的【少林寺第八銅人】後,真的有好一段長時間沒有看武俠小說。當我以為近年本地出品的武俠故事是否一面倒幾乎剩下漫畫而小說欠奉,我真的擔心過本地的武俠小說是不是真的式微時,看喬靖夫的這本【武道狂之詩.卷一】確給我狂喜。
喬靖夫在小說中流露的快狠勁,配合武者在武學上所狂熱追求的,配合得宜,很爽很利索。加上電影感強的描寫,故事中每個場景,人物每個動作每個反應,我作為讀者也彷彿親歷其境。
如果你對心生中某一件事有強烈的追求,或心裡面有《少林足球》中指的那一團火,嗯,你會好明白小說裡面每位人物的性格和感受。
真係好好睇。
期待卷二!

圖書介紹

6.11.08

痴孖筋應該係有跡可尋

明明約星期日去睇戲,點解我一直都咁順口答話星期四由我去買定戲票?預售三日呀阿桔。
囧。

另一件事,是星期三是我在那音樂中心上課的最後一堂。再見Amy!再見張生!再見Isis!跟導師胡小姐講起那個派對,佢話佢無去到。。嗄?點解係過去完成式?不是今個星期五嗎?胡更正是上星期,因為有事她也沒來這裡派對。。下課後搵Amy,才知真的是我搞錯哂,原來派對在上星期五哈佬喂那晚搞。。Amy話上來玩的人唔多,又見唔到我和胡小姐。。嘿嘿!我直說我搞錯了日期,mark落記事簿也是今個星期五。。
囧。。
白白Miss了派對耶。。

最後一堂,當然要同張生〔音樂中心的負責人,也是尺八演奏家〕,Amy及胡小姐坐在福祿壽畫像前拍張照。。哈哈哈,福祿壽是Amy對畫中人的叫法,其實是貝多芬莫札特啦。。嘩哈哈哈。

張生問我考得試未。。真汗顏,仍未得囉。他安慰我只不過無信心去考。哈哈。快一年喇,我都想快點升級。

祝他們日後事事順利。

5.11.08

係咪唔嚇過我真係唔安樂先

入場坐好等開場發現有miss call,散場後聽留言,是動物診所打來的。姑娘話已收到蛋蛋的化驗報告,叫我致電診所。。個人經驗,加電視劇都做得多,診所主動致電搵人通常都乜無好事講。失驚無神整個咁留言畀我真係嚇到我鼻哥窿都無哂肉,心跳加速。
不會吧!我想,只不過是耳垢,不會有太嚴重的問題吧。。
慌亂中,竟然一次又一次打了電話去做facial那間店,成10點間店只有留言。站在街上等緊巴士又嘈,搞到聽唔清楚留言內容,心血少了許多的我唔通還要乾等一晚?後來,打了幾次聽真才發現撥錯電話。。嘿嘿嘿。
真係嚇鬼死,姑娘原來話我知報告驗出有菌滋生,現在用緊醫生星期六開的耳藥有效,不必急著帶蛋蛋去診所轉藥。。就係咁多。
囧。。我忍不住對電話另一端的姑娘講,真係畀你嚇壞。
回到家,講畀阿媽知,佢都話間診所幹啥「咁有責任感,咁好服務」。
上次蛋蛋全身麻醉洗耳中途姑娘打電話來講一大輪才話要挖點耳垢去化驗,問我們同不同意。那次我阿媽答完好收線後都忍不住同我講以為診所打來話蛋蛋在麻醉其間猝死。。蛋蛋唔係寵物,係同屋住,唔好搵這些事來嚇我們。好心做壞事。。豈止貓,人也會被嚇壞。

4.11.08

非常11月

這兩個星期生活上有點混亂。
上星期六,11月1日一早又抱了貓去診所看耳。牠耳窩養了細菌的問題又回來了。經過上一次的痛苦經驗,這回蛋蛋反抗得更激烈。在診所內,醫生、護士、我跟媽四個人八隻手才按得住牠採了些耳垢去化驗,也用鹽水為牠洗了耳。
埋單一千一百幾。暈得一陣陣。因為我星期六一早已約了另一個單位,所以約了星期五帶蛋蛋去覆診兼看報告。這幾天,我們要早晚給牠滴鹽水,滴耳藥及餵抗生素。醫生說看看這幾天效果如何,覆診時再決定要不要留牠在診所再全身麻醉洗耳。。
後來,有人問我動物可以這麼短時間內再做全身麻醉。。我不知道。我只知要記著這個問題,到時問醫生囉。
由於星期五可能要留牠在診所到傍晚才接走,約了覆診才想起那晚我早應承了人去派對。囧。點算。
回到家,累得草草吃了一餐老麥換了便衫便睡覺去。。
星期六晚,一個人在家餵藥和滴耳藥,被不停掙扎扭來扭去的蛋蛋咬手臂咬大腿咬手背,牠經已去到一個不准任何人摸到佢耳仔的地步,怎可以輕易把藥筒插進牠耳道再擠出藥水。。唉,佢又吼我又躁,一人一貓鬥力半個小時才完成整個動作。。大汗淋漓,人貓也心力交瘁。
那天,好朋友生日的事,我完全忘了!一個sms或一通電話也沒有。囧。

星期日,11月2日。繼續博鬥。我終於明白,如果小孩子扭計扭好耐都唔食藥,serve緊佢的父母係好易發癲。家中,只有我跟蛋蛋。一個人一對手,咪畀佢咬囉。我本來預了一塊布畀佢塞落口咬,但佢要吐出來係都要咬手都無辦法。
佢唔跟我睡覺,又唔睬我,見到我總是繞路避得就避,我們的關係陷入冷戰。囧。
我想牠也不想見到我,而我也想牠可以安心睡覺,所以中午去了戲院看了兩場電影,再趕回家服侍少爺仔佢食藥。
餵藥折騰鬥力了半個小時,洗了手坐下來回氣,媽便回到家。。激暈喇我。

星期一,11月3日。由於我夜返,餵藥的事由細佬代理。點之條友仔捉唔實隻貓,搞到一落鹽水蛋蛋就狂甩頭,鹽水固然濺到周圍都係,但混亂中蛋蛋鼻子也吸了點鹽水。。辛苦到佢叫唔出聲。由於失誤,蛋蛋後來掙扎得更厲害。。雖然搞掂,但驚詔頭的貓轉個頭走入廚房又屙又嘔。因為幾乎是同時進行,蛋蛋仔不但一腳踩了牠自己的「便便」,也把剛才的藥跟胃液嘔哂出來。嚇到我同阿媽即刻抱佢洗屎腳。。真係從未如此狼狽過。之後,蛋蛋又再嘔多次。。
意外誰也不想。。

我媽有叫我星期二晚唔好出街回家餵藥,可是應承了人又買了票看電影。沒法。至於星期三晚,我又要上堂學琴。在這音樂中心的最後一堂,不可以走堂呀。幸苦哂喇蛋蛋。

至於這兩天的早上餵藥的任務仍是在我身上。平時我要06:50落樓趕07:00開的車,這兩天特別提早於05:30便起身梳洗準備。太累,人也變鈍,今朝行入廁所關門時唔識移開隻腳,門角炒埋落腳指度刮了一個洞,甩皮。。痛醒哂!