可以嗆的話不會谷……

是咁的。清舊物我只能以龜速兼隱秘形式進行。因為老人家會插手，甚至把丟棄的東西又撿回留用，所以我把有機會又被留下的東西由返自己親手拎去垃圾站或回收桶棄置，即使放到垃圾桶，都要全部撕爛包裝（舊火酒拭紙，舊口罩，高麗參茶包……）。明明剩下小量分類放在屋企的回收袋後來又出現在屋中別處的，有紙扇，有砂紙，有紙袋，有不織布環保袋，有膠罐……還不知尚有什麼佢留起放在別處未被發現。

呢日（526）下午寫完篇文講養 good vibes，晚上就自摑，狠狠的。

晚上抵家（一直抗拒這字，畢竟從來無「像家」的感覺。後來看《天官賜福》，花城曾和謝憐的對話中有解釋過類似的意義。即懂），老人在櫃上放的雜物膠籃中見到罐茶葉，拎出來問係咪我的，係咪茶葉，是什麼茶。重話罐面好多塵（肉眼可見），佢話用了牙刷刷走咗罐蓋邊的塵，我望到蓋上的塵，佢就話蓋面無抹（乜可以咁玩法？）。佢還坦白有打開蓋睇到裡邊拆了包裝（散茶）。壓住情緒的我話，既然打算打開個罐蓋，點解之前唔抹咗蓋上的塵就打開？塵咪會跌入罐裡邊茶葉度囉。佢秒答話無跌塵入去（佢真係當我係傻蠢）。佢仲話罐茶好香，心郁想試茶。是疑問句吧？我話這罐英國玫瑰花茶，唔太適合佢飲，會肚痛（而且得知佢既然開蓋又落了塵，更加不要飲），佢接住就自爆已拎咗啲出來泡茶飲了，無唔妥……

八十幾歲，見到滿塵的罐，唔抹乾淨就開蓋，香氣撲鼻，似茶葉，目測覺得無問題，兼認為可以食用，即使唔知係乜都照放入口……神農氏呀？

（以前買過乾花花茶，但香港濕度高，花茶長出蟲，在袋子內的花間竄來竄去，看得毛管戙。所以，花茶存放太耐基本上會棄。）

佢抹完蓋邊有無洗手才揭罐蓋？都估得到……無。

組合成個畫面，被戳中氣門的默默反眼。火已上。想爆的力氣要更用力壓住，可以嗆的話不會谷。無言以對。無言再對。想起下午自講完晚上就中自己放飛的回力鏢，因果來得太快，除了可笑，皆是可笑。

無再應佢，佢跟住就入房睡覺。

趁佢去睡，就整濕張抹手紙及棉花棒去抹去捽個罐。蓋面蓋邊蓋罅全是塵。又反多次眼。

遂在 app 同細佬妹呻，連圖為證，講咁都無爆佢，我真係好好好脾氣。

老人家見我日日執東西掉，佢日頭又跟手周圍摷但又天一半地一半。

同我鬥快。還出埋口試食……

因為晚上不便執拾，日頭佢又慣性開大個收音機我又要閃，所以每日清東西的時間不多。也不集中一處清，一時清一清放在廳的舊物，一時又清清睡房的舊物。紙張類又要愚公移山咁托去工作室拆件再碎又搬去回收桶又執一袋去工作室拆、分、碎、掉……

唉。還在努力清呀清呀～

氣未消，要去看展散個心。