新景園

呢日下午有個網絡安全的課，在灣仔上堂，所以完了課堂後一齊去排隊食新景園。

六點晚市，去到已有人龍。好好笑，當伙記拉起閘見到店外的人龍都忍唔住嘩。哈哈哈，朋友在同街返工，佢話新景園星期六晚市從未試過要排隊囉。

慢工出細貨，呢度食物上檯的速度媲美法國菜，等了差唔多一個鐘至上齊柯打。不過大家好耐心咁等，只係大家都好靜，氣氛有點奇怪。

我同朋友好食到頭一圍，對正門口，在等待的時間裡都係隔住門和舖外的食客對望。好尷尬的說。

朋友在同街返工嘛，所以由佢拍板落柯打食推介中的推介啦。

必食的咖哩炸豬扒。。好好好好大片炸扒。個咖哩汁都好惹味好香口！

炒通菜，多椒，爆過鑊，好有鑊氣。

生麵炒的，好正！

唔知係咪慣常，呢晚晚市無水吧，只供應汽水，於是劈了一瓶可樂。飽到…

有位大隻仔客人臨走時突然轉身向場內大叫「香港人加油」，全場即時一齊畀反應…哈哈。其實老闆娘點諗？哈哈。

不得不說，店裡上下都超好禮貌，好過好多酒樓酒店快餐店多多聲啦。