Olivary Olio: 又染髮

22.9.19

又染髮

因為翌日就要去飲，所以呢日就在樓下的頭髮用品店買東西自染，搞搞個笨頭的蒼蒼兩鬢。

店員介紹我用 InSight 呢隻牌子，佢話佢用緊，色都 last 到較耐。咁我就揀了6.31 - Beige Dark Blond ，諗住再有白髮都似 highlight 唔礙眼嘛…

結果，染完之後隻色完全唔係我想要的…近乎全黑，直頭個色變返中學生返學都唔會被捉的自然黑。

未染之前我頭髮係棕銅色喎。嘩哈哈哈。頭髮黑了，臉就顯白。嘩哈哈哈。

或者下次激一點，用91.2試。哈哈。

索性買個兜和掃。唔使每次染都要專登去食個餐留隻大汽水杯用。

店員執畀我原來係 davines 掃。原來自家用個掃去染髮好過徒手上色。

Suavecita' Argan Silkening Serum - 店員教我哩，開完個染髮膏再加兩滴髮油攪勻才塗上頭髮度對頭髮好。而且佢仲提議平日好好減少用護髮素〔對頭髮頭皮無益〕，每次洗完頭抹到頭髮無滴水，就用這個油兩三滴份量手掌上搓，再搓上頭髮度就可。比用護髮素更好更有益。咁 for 頭髮用的 argan oil / serum 咁多，我就揀了呢個品牌啦。

加埋我一星期用兩次用胺基酸洗頭水流頭，又用呢個油，頭髮確係絲滑了好多好多，再無乾巴巴的乾旱老態。