11.2.13

四款湯齊賀歲。。

大年初一在大球場的兩場賀歲波,賽果如何新聞都有講喇!頭場冬蔭功〔泰國蒙通聯〕輸了畀酸辣湯〔上海上港〕,第二場碗仔翅〔港聯〕就被人蔘雞〔釜山偶像〕打敗。

穿紅黑直間主隊衫的是冬蔭功隊。
冬蔭功教練好型!
酸辣湯主要係來港濕平?連後備球衣都無,變成這樣。。

先講頭場。冬蔭功同酸辣湯賽前都被視為幾啃的辣隊,點知呢一場辣辣對碰竟變成鬧劇。先是冬蔭功那邊龍門 TONG 拗柴〔骨折哩!在聖保祿醫院搞一輪,即晚回泰國治理,專頁寫他康復期是四至六個月!咁大劑!希望他早日康復!〕傷出換了一號球衣的龍門員入場,接著,呢位三十三歲豐富經驗的龍門員竟在禁區外以手球接波即時領紅被逐離場。作為一個龍門員,犯了如此哭笑不得的失誤,真係睇到全場嘩然。因為要搵人頂龍門個位,場中冬蔭功球員跟教練圍埋密斟,傾邊個暫代龍門位置,於是,又拖延了好一陣子。

邊個頂邊個頂?


球員變龍門,慌失失奇兵似的,輸人又輸陣,結果冬蔭功被酸辣湯擊潰。

甘巴爾個樣好似唔似UP伯。。
迪天奴在耍下波。。睇來無乜壓力咁。
王振鵬熱身做到足!
輸人又輸陣的,豈止冬蔭功一隊。。第一次睇碗仔翅上場,上半場真是。。

他們明明是球迷一人一票選出來的代表!
聞說碗仔翅只搞了三次集訓,上陣時欠缺默契是情有可原,不過也不會一個二個失哂本來水準弄得成隊似拉雜成軍吧〔雖則真係拉雜出來〕!?連埋門的機會都無呀!而且不停交波失誤,走位傳球統統亂七八糟。阿桔想必跟其他場迷一樣,皆奇怪甘巴爾明明排陣出錯都不即時換人重整隊形,任由碗仔翅被人蔘雞耍到頭擰擰。

人蔘雞果然是自小吃人蔘大咖!有氣有力,跑得快又迅,迫力也強,上半場碗仔翅完全是以卵擊石,無招架之力。



下半場初開波時段甘巴爾仍未捨得換人,碗仔翅繼續是捱打之勢。甘巴爾跟老闆「五件」有仇嗎?好咯,佢終於睡醒肯換人,成隊碗仔翅頓時好似灑了醋和胡椒粉多了辣味,活了不少。即使有比達〔即使他被改名為安達,但相信不少球迷還是愛叫他比達。哈哈!話哂係撒亞人王子嘛!〕攻入一球,氣勢也曾令人蔘雞亂了一陣子。可惜,時間剩下不多,人蔘雞又拉開了比數且拖延時間。。最後不敵,救唔到咯。

深宵,在電視重溫呢個比達入球!
超級撒亞人呀!請留心他的左手!

碗仔翅在初四會對冬蔭功爭第四名。阿桔真想知甘巴爾會怎搞的!

話哂今年主場係「五件」,做夥計無份落場拼都理應出席支持一下米飯班主,所以哩!除了要傑志伯伯,阿桔還見到均宜呀!他還坐阿桔後幾行睇波!耶!不過,阿桔害羞,不敢咁近距離舉機拍他。亦因為太近,連望也不敢啊!哈哈哈!

傑志伯伯,場內他應該是最大年紀!
當然,還像往年一樣在場內見到長毛!

新年快樂!

蒙通聯專網:http://www.mtutd.tv/

花絮一則。呢場蛇年賀歲波名為「中國移動衛星通訊盃」。但持咪人曾講錯成「中國衛星移動通訊盃」。哈哈哈!真係也夠亂!

沒有留言: