鬧市中的菇菇群

真係吹脹，本來打算去松仔園拍菇菇，點知道菇菇見不到幾枚。菇菇畀人摘哂煲湯呀？

誰料，之後乘巴士深水埔食過早晚餐後，到長沙灣怡閣苑等巴士，竟在路邊的花圃葉子下發現一堆菇菇。咦！頂！堆菇菇共有十幾廿隻，隻隻直徑多過五厘米！好癲！菇菌不是要有良好的空氣質素先至生得出咩？點解在車水馬龍的長沙灣道旁會長得出如此壯健的菇菇群！吹脹呀！專程去松仔園都見不到，反而在長沙灣的路邊遇上！

抑或，是個天安撫了阿桔的渴求？哈哈哈！

結果，一堆菇菇令阿桔好似傻人咁望好耐，還掏出相機拍照。有好奇途人見有個一臉認真的傻婆對著雜草叢拍照也走來看過究竟。

無法不認真呀！菇菇群實在長得異常茂盛，所以感覺很奇妙之餘，也不真實！

〔記於11月3日。如無搞錯，可能係布雷白鬼傘 Leucoagaricus Bresadolae (Schulzer) Bon.。〕