雀屎搽面之女

2017年發生了一件離奇的事。

話說公司有 shuttle 畀員工使用。由於我住在新西，咁，如果無晏起身，又不用去街上堂咁，就好順理成章坐公司車慳返一程又一程。呢個情況，以我高度，早上車兼坐唔滿人的我，總會坐車尾二行靠窗位坐，因為呢行位好闊，唔會頂住膝頭，亦唔會頂到前座椅背。本來都無咩麻煩…直至有一日…我發現新買不久的 GREGORY 背囊常粘著奇怪的肉色污漬後…

究竟在哪裡整污糟個袋？我有點潔癖，平常入 LIFT 都唔會挨埋牆的人，放低袋更加會望清楚座位乾淨否才放袋，先撇除在 LIFT 中招的機會。咁，出入都經過大樹，地下都有雀屎，有諗過係咪雀屎。不過，雀屎唔會統一的蝦肉色啦！而且，污漬總是出現在背囊上的某一邊。奇。抹過一次，但入哂尼龍交錯D隙縫度，根本抹不掉，成了一撻撻。肉赤死〔成千幾銀呀個背囊〕，叮囑自己出入放袋要多加留神小心。

那時，尚未諗到邊度「出事」。

其實我件 Aigle 外套背位帽底都有…囧

直到有次，明明剛抹了袋沒多少天，又發現新的污漬，而且竟出現在背囊帶度，位置係我揹上背囊帶子靠腰的位置…噫？正常揹緊背囊唔會整污糟到的位置囉！而且再檢查外套差不多的位置，卻完全乾淨。咁我才開始認真想呢撻漬係應該在我放低個袋時整污糟。邊度？返到公司我把袋放在檯底的盒上，回到屋企拎入房掛起，上堂放檯面櫈面唔會放地，還有 shuttle …

叮…

想起有次我在車上釣緊魚，突然靠通道位的 chair arm CHOK 左一下，扎醒第一時間望係見到後一行另一邊位的女同事個頭。如果司機急停的話，在同一架車的唔會佢撞到個 chair arm 而我沒有失衡。基於當時無想過呢條粉腸有問題〔無理由懷疑同事〕，所以都係諗條友腳短撐住腳坐跣一跣。

而事實係咪咁？佢坐後一行另一邊喎…點解會搞到前一行另一邊的座位？

越諗越唔對路，加上污漬又時不時出現，而且全都是靠車廂通道一邊〔背囊拉鏈的一邊長靠自己身〕。咁，為了唔想屈錯人，我就準備一個布袋作測試。我塞D野入袋，然後在上車前同個袋拍照，上到車把袋放在背囊旁邊靠通道，到落車再作對比。試了幾個早上，落車時都發現袋多添了新漬。

唉。佢趁我在車上睡覺時，就把佢D雀屎粉底擦落我個袋上面。佢鹵味。有無咁無聊呀頂！

呢件事我當然請教過不少人意見和解決方法，連向公司人事部投於都有打算過。亦在心理學堂上導師及警方〔同學〕分享過呢件氣憤事。

結論如何，在FB講過了，這裡不贅。

總之要同D屎忽鬼保持距離。放生一件仆街都要有條件。

呢D精神異常的慣犯，梗係要正月祝福下佢啦。係咪。肥屎 CAROL 。









呢件事。就係咁。

要警惕自己，賤人無處不在，以為最安全的地方，人就放鬆，其實往往危機四伏。

唔係講笑，返工放工坐車都見到佢個衰樣，負能量都會彈升好多。

悲哀係，呢件野有細路囉。