14.10.14

說話.話說

純家事分享。不吐不快,不想鬱積在心。

是日老母無同阿桔講說話。阿桔方面倒沒所謂。咪由得兩個老的自成一圈。

事緣細佬遲兩日過大禮,下星期要入廠切肉的老母好高興咁叫了老親戚入來幫手過大禮開開針針喎。還膠膠慶慶咁安排一齊在樓下酒樓飲早茶,十一點去鄰村速去速回辦妥過大禮就回家打牌云云。呢番話係兩老對住細佬及佢老婆夾〔註冊ed〕。原來打牌大過天!阿桔花生 mode

昨晚臨睡前,無親〔佢自己耐不耐就咁樣同人呻〕就問阿桔,過大禮那天放唔放假。阿桔無講佢知細佬一早就叫兩個家姐不必特登放假去過大禮。一來快脆搞妥,二來不要浪費一天假。家中還有病人,留假好尐。其實,今年剩下五天左右大假,細佬擺酒一日,無親入院一日,出院一日,佢住院四日中間有兩日又要請半日半日湊貓,出院後又不知多少天要回醫院見醫生。大假乾塘。老實,佢成日都想去玩〔化療期間夠膽死去海洋公園玩〕,阿桔的年假雖然可 advance ,不過,真係唔捨得咁樣犧牲自己下年的大假。而且。。

好喇,答佢唔放,今年無多餘假剩,好多工作要做,取 no pay leave 扣過千一日。佢一句「唔放就算甭反應這麼大呀」就沒有跟阿桔講說話了。

而且咩呢?咪就係即使有假多都唔放啦!阿桔至憎人賭同嘈,打麻將真係吵到轟耳。加上,阿桔無奶油自墜圈套留在家做阿四囉。又要添零食又要買下午茶,杯茶一唔夠熱又要幫手斟過換過。十一點搞過大禮,分分鐘午餐都要餵埋。NO WAY。無親就開心得過。上一回打麻將好像是過正月十五,母竟然一早開定檯同麻將在抹,嘈醒了阿桔。屎面是常識囉。

好在,佢無同阿桔講親人不多〔老共係孤兒〕細佬又只得一個過大禮都唔幫手呢尐廢話。否則阿桔一定反檯爆佢大鑊。因早年阿妹結婚佢嫌禮金唔夠女家酒席唔夠阿妹話畀唔到佢就拍檯叫阿妹唔好結婚。呢件事,阿桔不在場,係呢一兩年前才從阿妹妹夫口中聽回來,阿妹辛苦儲落一筆錢做禮金,反被嫌三嫌四,還被叫唔好結,可想有幾敗興〕。的確,年初聽佢兩母女講電話,因為細佬擺酒,舊事忽然重提。聽到老的拎住電話講邊有拍檯呀,唔小心撞到檯面之嘛,點敢拍你檯呀。。結果,呢次對話,不歡而散,阿妹同甥仔都有一段時間無打電話回家。

那天阿妹擺酒,由出門前到敬茶,個老的都無眼望過個女一眼。阿桔當年不知道原來係勒索不遂所致,因為一直從老的口中聽到,都以為係阿妹使壞,自把自為。

唉。

阿桔前世做錯什麼呢?為什麼會有個識得叫人知足但自己卻是個勢利小人的母,及終生以暴力和父權為王道的父?為什麼兩個都咁自私?

突然想起一件小學時期的事。

老師見家長,同母講,阿桔終日愁鎖,問又抿嘴不說,很擔心,知不知什麼事。母當然唔會覺得家中有什麼問題咖〔可悲係活了一個甲子都不知自己有咩問題〕,然後,兩個大人就這樣望著阿桔在沒聲中涔涔淚下。當年沒有說,現在也不需要說。

在價值扭曲且乖戾的家庭狹縫中長大。。阿桔的確是抑鬱得想死。

沒有仇恨,只是沉重的驚惶深深烙在心底。

.\ /.    .\ /.

今天,看小孩子在場內說出家中人竟對學生說了涼薄話非常傷心,他們仍是求學階段,日子還得繼續靠家人。深深明白他們肩負的壓力是何等沉重。

日子讓真面目現形了,已回不到過去了。

沒有留言: