豆漿王阿媽

這店位於石塘街巴士站附近，之前見到有招牌有粢飯，延了一些時間，還是要來吃吃吃。

在網上見到別人留 comments ，話店主一個人一腳踢，包粢飯，𢳂豆漿，收錢洗碗都係佢，所以可能要等，也能感受一下店主的脾氣。啊！除了我，也有個戇青買外賣，好似球員 mark 人咁，跟在店主後面一齊移動，店主提住煲豆漿一轉身就被擋，擋了兩次，店主終於火起，忟住叫個細路唔好企舖裡轉，阻住佢，還叫個細路坐低等。亦有人問有無電子支付……總之一個人一腳踢一間舖真的不易。厲害。

好啦，我不知窩貼係一隻隻賣，就在說要一份窩貼，就被教育，不是一份份，問我要幾多件，還說全放在門外的架上，唔係爐上面新鮮熱辣的，售完即止。入舖前沒有留意啊我。咁，既然有粢飯，就搭兩隻窩貼，加一杯凍豆漿。

凍豆漿加了碎冰，涼浸浸。不過超甜。

窩貼原來也賣剩幾隻，門外也剛好有人要買，店主在檯放低碟窩貼就話我好彩，係最後的了。

粢飯係即叫即做，捏成一個大飯糰！因為飯較硬，怪不得她要用力地捏耶。

詳細不講喇。

我還會繼續找粢飯之旅。