溯源

其實多不多人會問長輩以前的祖先及生活的事？總覺得，有好多事，長輩不說，後生不好奇不發問，真相就這樣消失天地間。

好多年前都想追溯阿媽那邊姓氏的祖上故事。不過，已無法得知喇。

據我細個時曾經問過聽過而知的，阿公係阿婆的第二任丈夫。阿婆娘家在（忘了邊個縣），有錢，有妹仔跟住照顧起居。唔知係有病先還是做折墮事太多引致，阿婆後生未嫁前係常吃貓目。細個（小學）聽到都覺當時半盲能見到鬼的阿婆好恐怖。回想，其實係佢對眼有事被人教吃貓目治療丫，還是她吃貓目多，太殘忍，才到得果報。謎。佢係打仗走難兼落難到香港。和第一任丈夫失散，一個乜都唔識十指不沾水又帶住孩子的年輕女人為了安頓生活就和阿公結婚（唔知點搭上）。又生了幾個（唉，condom 其實真係世上最偉大最人道的發明），太窮養不到有賣過仔，好似係兩個。Finally ，我媽係有一個哥一個弟一個姊，但大姊係同母異父所出。

阿公在戰時好似做過忤工，和平後做過校工。他肺病走的時候，阿媽其實只得十三歲，細舅父得幾歲，所以，不會管束自己的阿媽，那時已去打工，也去跟人周圍去玩去追星。反正舅父得幾歲，阿婆全心守，都守住這個仔。

……

想寫溯源，係和阿妹吹水講起阿媽那邊同姓幾代人都係騎呢怪，係，阿媽，連兩件舅父以及他們的下一代都係（有個攀附有錢女還擺出傲慢姿態），才堅想知那家族究竟出了什麼問題？山墳風水（佚失）？還是家族詛咒？抑或因果？

因為這家族令人不適，所以抗拒聯絡，所以再好奇都僅此為止。

😬😬😬😬😬😬😬😬😬😬😬😬😬😬😬

不得不補充一下，三月尾寫完這篇文幾日內發生的兩件事。

一：阿細佬有晚突然兼好似好不安咁問我有無聯絡過舅父舅母。唬我一跳，以為佢有咩消息知道要講。原來佢話過年無跟過那邊聯絡上，問我有無。當晚我為了平伏細佬不安，就 captured 和大表姐（姨媽女兒）的 WhatsApp ，講表姐年初一有聯絡過我，但無提到舅父舅母，應該兩老無咩頭暈身㷫，單純地無跟我們聯繫之嘛。

二：舅母突然致電老豆話好耐無見（好耐係超過一年），約飲茶，但就未講實時間地點。咦…上天回應得好快，我💡！係給我明晃晃的機會，應該出席參與，可以問一下祖輩的事。

神明！💛