記。0901。Whataboutism

絕大部份人應該一聽到別人用「你有無家教？」挑自己都會即炸。

但我唔太清楚自己係咪一樣會氣噗噗。

話說前一日，幾個人拎住幾袋衣包出發去拜山。就在升降機內，遇到認識的街坊入𨋢。寒暄一番，對方問去邊，胞弟就話去探阿媽。相識一場，對方就問放在哪，遲些去拜祭。此時到地面，老豆一邊出𨋢一邊笑笑口應機，話到時唔好約佢打牌云云。乜料？以為好風趣？我喝止都趕唔切。失禮事小，人家可能棹忌，如果有什麼頭暈身㷫覺得被詛咒就真係水洗唔清。

拜完山之後去食晏。把手中的紙團丟去酒家門旁為打邊爐人士而設的 「煙灰缶」上。我喝止，叫佢把垃圾丟到明明置在附近的垃圾桶裡，話呢個係掉香煙，唔係丟其他垃圾。佢竟然唔肯，話睇過個缶有水，唔會燃著。反眼。因為我堅持要佢執，最後佢都有執返件件垃圾放入垃圾桶。

在酒樓，佢拎出個撻不著火的打火機出來，話有 gas 就可 refill 。怕佢在家亂來，加上打火機幾元一個，於是幾個人皆叫佢掉左去再買新的。佢一邊聽，一邊撻火……係酒樓裡。又阻止啦，因為裡面應該還有少量打火機專用氣，怕佢真係突然撻著個火。呢頭講完，佢仲恃老咁話個機無氣啦，還對住手掌撻去打火機，怪我們懶緊張……若然撻出火，就灼了手，這是酒樓……

而且全程個孫望住。

我哩，這短短幾個小時，對住一個 whataboutism 的老人，已社死輪迴又社死又輪迴再社死……

所以，如果有人用「你有無家教」去撕我，我諗唔到自己會有什麼反應。

前題係，我無啦啦做乜挑釁人？哈。