X-File之搭程順風車

唔知大家有無睇昨日生果報的A版內頁呢？講九龍某差館鬧鬼呀！仲講到好鬼猛耶！聽鬼故至緊要有代入感，所以我昨晚睇到呢段事件也覺不可思議。如果搵到當時在拘留所幾位見鬼的人再確證一下傳聞真偽就更好喇！想想，那些人經過了如此恐怕的一役，想必會乖乖做個奉公守法的公民，免得再因事被困在那裡再遇「」啦。。準會嚇死！

以下這件事，source係源自我老豆，仲係好多年前講的事。我老豆成日話世上無鬼，但佢有晚聽我同阿媽兩個講鬼突然搭訕講件好鬼的鬼事件我們知，簡直以為邊個個故事勁邊個就有得派彩。嘿嘿！

話說有晚我老豆放工乘車回屯門，當車行駛到屯門公路時，車長開始大叫企樓上的人行落下層企，樓上唔可以企，好危險之類的話。不過，在下層的一眾乘客一直都見不到有人「面懵懵」地從樓梯出現。過了一陣，車長顯得有點生氣，再高聲說，樓上企緊的人唔該落下層，再企在上層巴士就要停靠在公路旁直到問題解決車長才開車。樓下的乘客聽到這個已在埋怨樓上那冥頑不靈的乘客，可是上層仍沒有人走下來。老豆當時在下層近樓梯位置，他曾多次引頸望上層八卦一下，不過他根本望不到有人企在上層樓梯口附近。而上層的乘客多番聽到車長的話也沒有人搭腔。

莫名其妙，大家無話。

終於，車長真的動肝火，遂把巴士停在公路，氣沖沖急步邊罵邊踏階上上層，罵什麼？咪係鬧那乘客嗌極都唔聽唔睬囉。而結果係，車長在上層根本見唔到他一直指罵的那個人〔幾個定一個我都唔記得喇〕。老豆話當時見到車長在上層逗留了一陣，沒再說話，臉一陣青一陣白下來回到駕駛座開車，全程再沒有講說話。

而整個車程，也因為這一件詭異事件，令到所有乘客也不敢多說話。

我聽畢，也替坐在上層樓梯位附近的乘客心寒。。真係會驚到腳軟呀！

好想知但永遠不會知道的是，究竟那位車長從上層下來之後回駕駛座，從那面鏡中再看不看到那「乘客」？

不得而知嘍。