屬運動員專有的奧運

由於對上一屆奧運的所有比賽全無印象，連美男籃輸波，費斯游水、劉翔封欄王甚至其新聞我都無記憶，可以話係一片空白，我懷疑上一屆我飛了外太空，或者入了無電視無報紙的深山，嘿嘿！一場比賽都無睇過，世界發生緊什麼也不知。
至於京奧，開幕禮那晚去了看電影。真正覺得這是場世界性運動會，是電視由朝播到晚搞到開始睇比賽見到好多好多外國人參與，好多好多外籍裁判球證才信。而吸引到我後來追睇奧運比賽的，當然係為了睇孫悅。哈哈哈。
不諱言，這年的奧運，是我有史以來看得最多比賽的一屆。也認識很多運動明星的一屆。最難以想像，係後來我連唔睇的報紙體育版都會攤開來睇花絮花邊〔圖源：apple日報〕睇賽果睇比賽規則。
無法，比賽太多，而電視台播比賽又好選擇性，本身班唔專業的主持經已睇到火爆，又成日故意播中國隊喎，又不停為中國加油喎，我好想睇外國人嘛，真係睇到我勁不爽。無論什麼膚色國籍，出得來比賽個個都係日練夜練長年累月練練練的運動員囉，主持卻只識嗌「中國加油」。。唉。同時間有好多比賽進行中連外國選手的片段也刪剪去，好唔持平囉。
跳水剪，體操剪。。又顧住去廣告，又要畀主持人出鏡講廢話，真係有時睇到無心機。
就好像女排，電視台直播中國古巴爭銅牌，但爭金牌的美國對巴西之戰，卻要待到午夜才重播，睇完場波，都撐到凌晨兩點幾。。
作為籃球迷，最不可思議係星期日場男籃金牌無直播頒獎囉。無記無，亞記無，我一直看的明珠台都無呀〔鬼咩，一見無記有阿叻做主持，嚇到即刻轉台〕！我好想睇美國隊全隊人賣牙膏咁笑哂上台領獎的丰采呀！
之前Michael Phelps拎八金時，我都好緊張驚電視台唔播。。
看到很多難忘又好笑的鏡頭。。如Usain Bolt的囂張和不斷擺出龍珠式的姿勢，Matthew Mitcham成功跳水獲最高得分興奮又亂作一團的哭樣都好難忘好難忘。當然，也有睇到O嘴的鏡頭，是的，令人O嘴的豈止是那些死雞主持丫。
例如有天下午看女子四人雙槳賽艇，我見到拎牌的四位有人一舉手揮舞就露出幾隻飽滿的海膽作全世界分享，嘩！真係丫！唔使睇高清都好清楚，一定收埋養了好一段時間！心想《色．戒》潮乜仍未落咩？當男子體操隊那邊都把右左兩件海膽修剪修剪，賽艇的幾隻海膽一攝入鏡，簡直可以用驚天地來形容！不過，後來6點半新聞播出時巧妙地cut走了幾孖飛揚海膽。無睇重溫耶。
嗌得最大聲算係睇住美國男女在田徑場上相繼交捧失誤，跌捧也跌了心臟咁滯。。

屬於運動員個人榮耀而非國家榮耀的比賽是最好看的。可惜，應該睇唔到。

孫悅個人資料！

美國領獎組圖！