搞搞新意思

我很懶打理頭髮，加上不愛上髮型屋〔我曾試過兩年唔入髮廊〕，瀏海太長會在家拎起剪刀自己剪都不去髮廊的程度。本來髮尾一束長一束短，髮尾太碎已令我搲頭不已，可是，早個星期，我竟失手，瀏海被剪出個災難，於是，還是要趁快去髮廊救火，算啦！反正都近新年，白髮又多，都係執執個笨頭好尐。

對上一次去髮廊已是上年四月的事。在阿蛋走後不久。那是一次不太愉快的經驗。不知是不是負責的髮型師跟同事不咬弦，那次我染髮後出來的顏色跟色板上揀的相差太遠〔我揀了暗綠色，染出來卻是明顯偏金色〕，就在此時，有位坐在沙發休息的髮型師阿叔跟身旁的同事以不友善的口吻笑著說綠色變成棕色，真係唔知點做到。我完全聽到那位阿叔講的一字一句，站在我身後的髮型師怎會聽不到丫，見他怪尷尬的，我當時都幾老尷咖。不過，原先因為染料太綠〔是綠魔的綠囉〕，未塗上頭髮我已後悔，驚染了一個問號人出來。幸好見到出來效果不是勁綠，而且棕色，反鬆一口氣。

那間髮廊，不去了。

 
基於我從來都不會幫襯同一間髮廊〔隔成一年才去一次，個髮型師都唔會記得我啦〕，所以今次又去過另一間，看看有沒有機會撞出個火花，剪出個驚喜。呵呵。

這次去了一間新開業不久的髮廊，在面書上找到的。因為髮太亂太碎，那位髮型師都花了個多小時同我執返似樣的髮型，瀏海部份最難搞，一來被我狠狠剪去的那段實在太多，加上我在家的話習慣戴住頭箍，瀏海係往上蹺，哈哈，結果瀏海修剪一下要先整個負離子直髮先可以再執執囉。

 
如何？未試過咁爆色！所以拍照留念先！是的，這是中段，剛漂完髮。前後漂了成粒鐘，痛爆。漂一次後，因為色未夠，再補多少少上去，又再等廿分多鐘才去洗頭，這是洗完頭上染髮劑前拍的。髮型師話色仍未夠，問我再漂不漂。不過真係太痛，所以說這就夠了，好痛，頂唔順。不過，原來漂完再上染料，更痛。

就好似有個傷口被消毒藥水碘酒沖洗緊咁囉。

這次漂染經驗，真係一次貨仔好喇。堅痛！

真佩服那些漂過頭髮又會再漂的勇者。

當然，都怕自己頂唔順，當晚回家已即刻洗頭做頭皮護理。要勤力尐，日日做一次頭皮護理。