好肉赤囉。。

有日見到 E 的 Pt 項鍊唔同樣，因為聽聞那條 Pt 是 E 個仔八月送給她的生日禮物。於是問 E。E 說，除衫時候唔小心扯斷了〔嘩！點除衫咖？〕，只好去金行換過另一條。。『嗄？怎換？以什麼價位換？那麼補了多少錢？』從未試過去金行換貨，純粹好奇，所以問。

「咪以物易物，補回新舊鍊重量的差價，再加新鍊佣金同手工費，補了好少錢之嘛。」

『咁又抵喎。。』

好喇。因為 Pt 呢幾日跌到 HK$9,900/tael ，於是我又心癢癢想去換粗少少的頸鍊。結果去到金行一問店員，就發現完全不是 E 講的那回事。金行係以買入價去買返金飾囉。。

1/ 假設 E 條項鍊當日〔八月〕在金行賣出價係 HK$12,600/ TAEL，假設佢條鍊係 4 mace ，手工當係 HK$400 喇。當日佢個仔就係付了 HK$5,540.80。〔HK$1,260 X 4 + 2% 佣 + HK$400 工〕

2/ 假設 E 早幾天去金行換鍊買入價係 HK$7,500/ TAEL。那麼，E 只袋回 HK$3,000 〔HK$750 X 4〕

3/ 假設 E 換了一條一樣係 4 mace 的項鍊，手工價都係 HK$400 咁計，以早幾日賣出價為 HK$10,000/ TAEL 為例，這條新鍊就要 HK$4,480。〔HK$1,000 X 4 + 2%佣 + HK$400 工〕

表面上，換鍊當日只補回 HK$1,480 〔HK$4,480-HK$3,000〕。可是想真點，買第一條鍊當日HK$5,540.8 ，然後 trade in 得HK$3,000，已有 HK$2,540.8 的差價。換言之，換一條同樣重量的鍊，付出的是 HK$1,480 + HK$2,540.8 ！

成4000銀呀！

條數應該係咁計嘛。。係咪？噢！咁咪蝕到入肉！？

究竟 E 係咪計錯數？定係求其答兩句敷衍我呢？

於是，在金行的我決定不換鍊喇。。當然啦，我心算同埋數口出哂名唔掂，即時在金行計唔到咁多啦，只係，金飾賣出同買入價係有 HK$2,500/tael 差距，所以唔計尐佣同手工價，唔計金價升定跌，本身都好蝕咖。若趁金價低放金，就真係非常之蠢。

鍊，斷左咪收埋先，等金價升返去買金當日金價先拎去金行換過條都好丫。趕住戴咪買過條囉。。唉。即使唔係我的錢，我都感到非常肉赤。。

牙痛咁聲。。