絕對水魚事件

情人節那晚食生日飯，是一件玩得死桔和同桔慶祝的人。搵間像樣的，或求求其其的，都會被那些巧立名目的餐宰你荷包，而會否被宰得一頸血，就視乎那食肆的良心。

一個人吃，呼吸困難。

兩個人吃，變成水魚。

一班人吃，有點怪怪。

想去的餐廳因為滿客，於是當晚 walk in 到灣仔的 Double Tree 吃。因為大王想吃此店子甜品師整的心太軟。

店子為了掙錢，以前兩人坐的四人檯拆成很多檯。每檯只得兩張椅子，而檯面就比攤開的餐巾大一點。食客就椅背撞椅背的坐。因為環境和檯面皆太狹窄，阿桔和大王在這一頓都各自都倒瀉水。真係狼狽。

點菜的時候，待應說祇有一款情侶套餐供應。五百幾六百元的套餐，甜品是芝麻雪糕火焰雪山。阿桔問可否轉心太軟咖，加個差價也可。待應話可以點，不過要付正價喎。因為沒有其他，我們只好點那個無其他得揀的情侶套餐。酥皮龍蝦湯是唯一供應的湯，前菜，大家都揀了煙三文魚沙律，主菜就食牛柳，阿桔要薯蓉，大王就要天使麵。牛，阿桔要五成熟，大王要七成。

就在我們等上菜的時候，見到鄰桌的熟客拎住餐牌散叫。。登時吹到啤一聲！

沙律求其，主菜才匪夷所思的差！餐廳無主動供應鋸扒轉用的餐刀，扒，順紋理也切不開。阿桔用九牛二虎之力才撕得開舊無肉香的牛肉，反艇。又話薯蓉喎，其實係烚薯仔拌薯碎，既無忌廉香也沒任何味道。而且，還叉到一舊舊的薯仔囉！什麼薯蓉呀！頂！至於兩碟扒，大王的那碟跟阿桔而前一碟係一．模．一．樣囉！咁阿桔要的扒跟薯蓉有什麼意義？大王看著用碟仔載著另上又乾又凍的天使麵，係跟邊一碟扒呢？

好了，吃了扒，待應收碟時問飲什麼。兩杯飲品，等十分鐘都不見上檯。望著樓面四個職工行來行去，無人見到客人檯面空空如也的麼？忍不住對做大的那個出聲，才識得嗌其中一個樓面入廚房整餐飲。唔係呀化！甜品呢？又要等。問完個甜品，隔一陣，那位做大的竟行過來問番我們係咪芝麻雪糕火焰雪山這個甜品！唔很係呀化？

之後等呀等呀，終於等到了甜品。大王話火焰雪山內裡配芝麻雪糕味道不搭配，而這個不是桔和大王喜歡吃的甜品，所以。。唉。

嗌埋單，個男待應見到也畀了反應，點之條友走左去帶位，跟住又去執檯執刀叉，跟住又搞其他事。我們望住佢搞呢樣那樣都無行返去收銀機度打單。失憶症咁嚴重？有個待應過來斟水，遂忍不住嗌左埋單好耐啦！那位阿頭聽到，急急出單過來還抱歉一輪。有用咩？真係！

無言。

難吃加爛服務沒有影響是晚心情。因為遇上相同問題的客人豈止我們一檯。大王留意到，有一檯嗌埋單又係等極都無人理，索性自己行去收銀度埋單。而有一檯，團購的，個朱古力火鍋上檯了，但配料遲遲都未見。當然，大王也趁大量的等候時間，上開飯網看食客的評語，發現有人寫「貼錢買難受」，寫被待應鬧。。嗄？看來真係要檢點一下，否則食到出事，畀錢敗興還要被鬧，火爆桔同佢「開年」都會呀！

幾年前阿桔覺得呢間好食才帶大王去食，大王都覺得可以一去再去咖，阿桔亦有介紹朋友去。可惜，一次比一次失望囉。明明店員個個做了好幾年，但直到現在個個仍好似新入職咁，最基本的服務質素都做唔到，甩漏多得過份。阿桔早就不想再去喇，是大王念念不忘那心太軟才去。今次之後，大王都賣佢怕了。

埋單六百幾，呢一餐真係蝕到入肉。

好好，阿桔要帶大王去另一處食心太軟。