家門不幸的家好月圓

即使沒有追《家好月圓》，身處香港，仍有大量渠道知道每日劇情的最新發展。演員好戲，也不代表套劇好勁。而且，坦白講，班演員又唔係特別好戲，劇情又有歪倫常，如此一套爛劇竟能有這樣的收視真係奇談 / 譚。我真係好想知班捧場客覺得套劇有咩咁好睇。
香港人個腦諗緊咩呀？莫明喜歡睇人吵架鬧交左摑右摑？
只睇最後一集，發覺這個家庭上下大小真係變態又低能。
劇中兩對陳豪和楊怡，林峯和鍾嘉欣雖然沒有血緣關係，可是他們兩對分明就係亂倫。一套思想守舊又傳統的劇竟然涉及亂倫，難以想像。至於徐子珊先搞陳豪再搞定黎諾懿，大家睇到唔打冷震咖咩？愛有幾多睇唔出有囉，反而兩兄弟先後都和同一個女人有親密關係就好肯定係有歪倫常。
閉門一家親，飾演這家人的親家的韓瑪莉看在眼裡，會怎想這家人。
李司棋飾荷媽這角色，真係教壞觀眾！尤其是家庭出了問題的婦女。被誤導哂。之前男人通姦還要分家，對著如此窩囊的男人，她大口氣話畀佢都唔要，女人當自強，很好。在結局，十幾年後的她竟然容許自己和夏雨飾演的前夫再續情緣，啞口無言，這絕對不是偉大，而是確確實實犯賤囉！最恐怖係班仔女同家人唔理人感受一廂情願在公眾地方一同慫恿個老母和老豆復合，我以為女人仍會自強不允，反正一個人的日子早咬緊牙關過了。點之。。女人終揀了一條可滿足大家心願的路走。做女人做到咁唔係賤係咩？感情沒得勉強，何況男人當日如此狠心棄糟糠，敗了一頭完整的家。或者，姣婆原來真的守唔到寡！無老伴真係過唔到世咖咩？
我想到兩個人分開十幾年再睡埋一張床，然後。。真係。。越想越核突，越想越心寒。
很多家暴中的男女，都因為都孩子有個看似「完整」的家而繼續與敵同眠，繼續飽受虐待，沒有解決問題，也令問題衍生得更多。。作為收視冠軍，多少都對社會有影響力，就好應該教女人自強自愛，而不是再跳入暴風雨中。
再說，班仔女個個都係成年人，都應該見過世面，可惜仍然這樣推阿媽落陷阱，居心何在？發生了的錯事真的可一筆抹去當無發生過？
同樣是賤，荷媽這角色是作賤自己，夏雨飾演的祖爸也真太賤格。
結局有場，夏雨和飾演妻子阿紅的米雪講，和她一起的日子不開心而且係錯誤。。嘩！一句話，就全盤否定阿紅過往的付出和十多年來兩人之間曾築起過的感情。女人再壞，也不必得到這樣無情無義的話吧！然後，他大模斯樣回前妻的家咬拖鞋飯，『我係咁咖喇！吹咩！』的態度真叫人嘔血。。如此賤格一代男，真係難以想像還得到這一家人無限量的支持囉。
浪子回頭唔係大哂咖！軟皮蛇更加唔可以縱容！何況持續了十幾年都係咁。。
女人跟著他，真係前世唔修。
嗯，這個阿媽也算差勁！仔女個個又乖又孝順又黏家的確厲害，但過了火位就變成養出一窩個個都無乜朋友無乜前途靠父母靠家產養命的超級裙腳仔。
囧。。
那晚有個發現，整集阿荷媽對住祖爸都係擺出一副好含蓄好見外的模樣態度，但係劇終阿黎耀祥飾演的角色出現時，明明正正經經跟韓瑪莉瞎聊的女人突然興奮地走去捉實剛入屋男人的手臂，還熱情地拍哂肩膀，眉開眼笑到擠成一線，似潘金蓮上身咁。話這個女人同這件男人有感情〔或索性有姦情〕反而更似囉。
當然，李司棋這場戲的反應係突然over哂。
之前李香琴常以高八度的聲音唸對白，誇張失真，真係一聽到就頭痛。這種老人家，一點也不可愛。
當然，我無法接受一套劇幾乎常常出現潑婦罵街，破口大罵的完全係逼人精神分裂的情節。當角色常常作無厘頭的困獸鬥，有咩好睇？現實中，一早就握刀握棍互片啦。
家暴不就是這樣引發嗎？

我有同事話，睇套劇係因為真係好低能。
不知，純粹因「低能」因睇「嗌交」而追看這劇的香港人有幾人？
如果一套收視劇的「主菜」是搵交嗌，人物角色歪理連連，彼此鬧交鬧得越火烈，話語越怨毒就越能吸引觀眾，我也替香港的電視觀眾的荒謬感到悲哀。