沙嗲牛肉蔥花煎蛋麵

有朝在office嗅到一股勁香口到令我垂涎三尺的沙嗲味，循著味道吸引，見同事Wi正在自己位開餐咬早點。是一碗一睇就知應該好好味的沙嗲牛肉蔥花煎蛋麵。Wi一邊強力推介，一邊叫我打電話搵包包幫忙買一客上來。
那間小食店，位於OFFICE附近一幢工廠大廈的後樓梯底，而「堂食」的座位，則設在樓梯的幾個轉角位，是一檔設備超級簡陋又陳舊的熟食檔。睇人睇事唔好齋睇外表，臥虎藏龍又便宜又好食的熟食檔在這裡偶會發現，真係食得驚喜。
這樣的食店，同事話好懷舊，我則想起雲南青海西藏西寧那邊的地道食店。。裝潢十年如一日，也暗暗舊舊。。哈哈。
真係好耐無食過咁有水準的早餐喇！沙嗲雖然不太辣，可是夠惹味。牛肉是佳作，切得好，沒有筋，不黏牙，而且入哂味，Yummy！不愧為老店，沙嗲牛肉是用舊式電飯煲的內膽盛載的，非常懷舊！
另一個驚喜位，就是煎蛋！荷包蛋好多茶餐廳都會有得食，但煎得似樣的少，煎到好味又好樣的更少。很多都煎過頭，蛋黃硬哂，快餐店的又有陣膠味，有些無光澤，甚至有些店你見到碟好馬虎的煎蛋就自不然會懷疑個廚其實識唔識煎蛋。。
這間小食店的煎荷包蛋，蛋白色體通透〔有人說像溫泉蛋！〕，一泓蛋黃像是被一團白雲包裹著，是水準之作。
第三個驚喜位，當然是灑在麵上的蔥花，蔥花在熱湯中沁出的香味，真係令一碗經已好好味的麵錦上添花。想想，真沒有印像食過這樣的早餐配搭。
如果嫌食個麵當早餐太heavy，可以叫蛋牛治。這間店沒有鹹牛肉，賣的是沙嗲牛肉蛋治。老闆會把沙嗲牛和蛋攪在一起落鑊煎，惹味。
沙嗲牛肉蔥花煎蛋麵，盛惠14元。

沙嗲牛肉蛋治，盛惠9元。