由得我繼續瘋言癲語

繼續仍最狼狽的星期六。和朋友仔二月的某天撲了19號晚灣仔藝術中心上演劇場《仲夏夜之夢》的票，湊巧較早之前響哂口搵人撲《墳場遊蹤》的票，怎料活動和劇場在同一天舉行。〔還有一個湊巧同日搞的gathering要我忍痛推掉。點解一係無活動，一係就撞到放煙花哇啦啦？〕

講番星期六，本來下午遊墳場午后5點半散隊便和朋友仔匯合食飯再去睇drama就最好。雖然朋友仔其實四點多便好得閒兼曾約食high tea我又無奈推卻還叫佢搵事搞逛陣街都好來kill那個多小時。點知一隻浣熊過埠玩樂，令到一直以為好妥當的安排頓時失哂預算。傾盆大雨個個寧願在室內或唔出街或窩住大商場的下午，我真係無可能冷血地叫朋友一條友在無大商場可落腳可遊蕩的灣仔街上胡亂kill時間等我。換了是我都覺好慘情。於是，咪提早離隊趕去灣仔囉。

兩條友，搵間café坐幾個小時吹吹水都好丫。。but，當務之急，係衝入時裝店買衫褲襪換囉。我真係濕到似剛游完水上岸。我條老牛，經已由褲腳濕到上褲襠，啜住對肥腿，真係又重又要命。雖然未濕到入內褲，但咁樣狀況根本連坐低都唔得呀。我精神上真係接受唔到。。我有想過真係想咩都唔睇咩都唔理就咁回家算咖。。

又濕又披頭散髮，癲婆一樣。你搞到我狼狽到爆呀我。浣熊。

當然，不得不多謝朋友仔的體貼。。買定條靚靚毛巾讓我抹頭抹風褸。謝謝。

你知我有一隻手唔係咁方便咖啦，還要拎傘又要提著一大袋又重又濕的衣物繼續在風雨下行動，殺左我好過。我有求過個天不如大方點，落勁一點讓浣熊谷到8號咁大隻我咪即刻高高興興乘車回家唔使煩囉。點知無黑雨，天文台還講到明不會谷大隻浣熊。。

好不容易，咪去了波士頓咬個擺明sell江湖味的濃情鐵板扒餐囉！五成熟都幾腥風血雨咖！都快5點啦！喂，我唔大食咖。事實我連起床起計到咬扒未有正餐落過肚，還要在風中跟暴雨鬥力了幾粒鐘。

Sorry，我唔想咁核突，不過真係唔想搞到對水腳甩皮兼養出個腳氣病來。我個個星期都要畀隻腳物理治療師檢查，所以我對自己對腳的整潔度有堅持囉。。落完order，我知會一下個侍應，便脫下鞋子畀對腳乘涼。真的沒法穿上可榨出水的鞋子施施然鋸扒。

朋友擔心踢拖屬衣衫不整到劇院唔畀入場再死死氣著番對濕鞋，所以曾打算買對拖鞋的我也只好打消念頭。而且，再挽著多對成斤重的鞋步在街上都咪話搵自己笨。

後來，入到劇院才發現不少觀眾因為大雨而著得非常便囉。。拖鞋短褲。。by the way，入場坐好我都悄悄脫下鞋子。

如果事發當日你曾在上述地點目擊類似事件和一件茂利。。那個就是我。

唔好意思。。多多包涵。。

失禮哂。