小心街頭自願被騙案

積存了太多事想發表在這裡，手得一對，腦有兩個，要諗要組織要歸納的事真係亂過亂世佳人。

這幾個星期，親自遇上兩宗街頭騙案。鑒於特此走去問過有關方面的人得知這樣的騙案警方很難受理拘捕疑人，所以不妨寫出來望大家要是不巧遇到也不要受騙。

當然，香港人唔會咁易受騙。。感情另計。嘿！

案情非常簡單。一位穿整齊西裝，手抱公事包操流利普通話的壯年男性，會走向獨行的女士，禮貌地問女士聽不聽得懂普通話，如果這個目標點頭或答聽得懂，疑人就開始背誦他一大堆的無QC過毫無邏輯犯駁連連不成理由的台詞，說他是在內地來港工幹，約了人在這裡等但對方卻失約云云。最後是，因為人家失約，他現在又很肚餓，可不可給廿元買吃的。

廿元。。沒有沒有我無錢。第一次我這樣答。那位疑人就不再說什麼。第二次在另一個街頭遇到另一個抱同樣夢想的人再對我唸同一番對白，我答我沒有時疑人竟不可置信地反問我，我便直說香港人慣於使用八達通出街買東西呀乘車呀，沒有現金傍身有啥出奇？疑人就啞哂不再糾纏。

擺明唔畀咖啦。由於對方沒露出尾巴，也沒有惡言相向，所以「好惡的我」沒有機會發作。唔畀就算，沒必要還要寸人。

朋友仔話，如果我當時真係畀兩草佢，係屬「自願」囉。當然，我可以向警方留下疑人的特徵作備案，讓便衣警察查找。

第一個疑人身形似玩抓舉，食少一餐一定餓唔死佢。如果佢有血糖低的問題，個人更應隨身帶點零食以作不時之需囉。第二個疑人更荒謬，昂首闊步，身高有1米9，大大隻隻，黑黑實實，健健壯壯，食少一餐都頂唔到？而且，作為旅客，沒理由身無分文都唔返酒店/賓館反留在街上不停向途人乞餐食囉。真係離奇過小說。

當然，集腋成裘，無本生利，廢話幾句博到兩草，集得多都幾和味。

朋友仔跟我分享過一單類似的「問你要錢」事件。話說有朝朋友仔上班途中經過公園，被一個道友走來問佢「借」兩草去買個「早餐」食。咬緊包的朋友仔即時發難：『我都係買幾蚊個包咬咬做早餐，你好意思問我要廿皮咁多去食早餐！』

嘿嘿嘿！諗諗，乜我個樣似好易被騙耶？明明我個樣兇惡好火好不平衡咖喎！

唔信？有圖為証。嘿嘿嘿~