之後，再之後。。

鑿了一大篇勞氣文咖，不過鑿完又唔想公開。算了。

老母流感出院後因心臟太弱被醫生命令做埋導管甚至通波仔保障安全。突來的手術事宜，糾結得出院後又喉痛又發燒又乾咳又頭痛。星期二叫細佬星期三早點上來接佢一同去醫院聽術前講座佢又唔順便睇埋醫生。拖到星期五再去醫院時才被確診生蛇，即係帶狀疱疹。重要係生在臉上。從來對戴口罩有過敏的見臉上有瘡以為係過敏所致，沒料到咁大檸樂。星期五晚回家見佢，一邊面腫到似被人打了重拳，又爆了很多瘡，而且真係爆到沁著水那種。問佢有什麼藥，醫生只開了治帶狀疱疹的特效藥而已。藥膏都無支。止痛藥也沒有。

醫生無開收鼻水藥，佢仍不停流鼻水，眼也因為面腫了睫毛拮到眼而不停流眼水，瘡因為戴口罩時黏著口罩的膠而破損，爆到去鼻樑近眼角。。一邊臉亂七八糟。

星期六，見佢塊面比前一晚更腫，一隻眼完全瞇成一線睜不開，怕菌因為佢抹抹抹時把菌抹到眼，於是問得佢同意，又飛的去急症室睇。

因為有傳染性，醫護在水洩不通的急症室騰出一個特別位隔離佢，而且還可優先入房見醫生。

醫生很好，開了止鼻水藥，止痛藥，藥膏及眼藥膏畀佢，還安排埋佢睇眼科。

於是，星期一下午又要請假同佢去睇眼科。。二點登記，眼科那邊卻叫佢三半再來登記。因為佢咁樣又不好去茶記等，只好在附近公園呆坐磨了個半鐘，期間阿桔就去了買菜。好不容易等到三半，登記完，工作人員要鎖LIFT畀佢上樓，而且上到候診室時又要把佢安置在獨立房間等驗眼。雖然候診室已得寥寥數人。

醫護用藥擴大佢瞳孔檢查，要待半個小時。阿桔在出面等到想死。好累又睡不到。剛釣魚，姑娘又叫醒阿桔落去地面交藥費再去另一層藥房取藥。那裡又排著幾十人。

累到。。簡直要了桔條老命。

至於心臟手術，延至下星期。。

奔波了一整個馬年，身心都真係好攰好攰，畀我休息下得唔得。