大澳．其記

本來諗住抵大澳第一件事係入酒家食炒蜆醫肚先，可是不巧時近團餐開飯時間，所以酒家都說要等好耐先有得食。咁呀，實在太肚餓，於是到附近外觀十分地茂的其記食個簡便啦唯有。反正嘛，整個大澳周圍都有食檔，應該唔會發生「有人餓壞事件」啦。

其記果然十分地茂，供應的食物比公司附近的工廠飯堂還要簡單。飲品嘛，我當然點了一杯例牌：凍檸茶。外加一碗餐蛋丁。

杯凍檸茶上桌時確嚇了阿桔一跳，沒有檸檬，走冰，還有色澤很混濁。除了飲老麥和盒裝檸茶，我真係諗唔到邊度會有這樣的沒檸檬的檸茶供應，而且，還預先雪凍，不必嗌少冰都「走冰」喎。話雖如此，飲落口就知係杯檸茶係好味咖。後來在開飯網睇到，其記的招牌菜，竟然係呢杯凍檸茶。哈哈。大抵大家都是被第一眼所見的拋窒哂。哈哈哈哈哈。

至於個餐蛋丁，驚喜。那片厚切餐肉已增加了好感度啦，肉香四射，真係令人食指大動。當然，個麵用小銻煲淥，所以特別好味。不過，貪心的想，如果豪我兩片翠玉一樣的生菜放在午餐肉旁邊，整碗麵會更靚！

推介。