人係要展望將來

工作的部門今日遷出中環長江中心。這個星期pack 東西 pack 到手軟。
長江中心起好不久，便由銅鑼灣新寧大廈搬過來。在銅鑼灣上班挺好的，食和買都好方便。而且，新寧大廈嘉蘭中心旺中帶靜，成日有人拍戲拍廣告，由《英雄本色》到近期的爛透的《文雀》啦。。所以那邊常常碰到明星咖。而且王大導的澤東辦公室更在對面馬路，樓下間餐廳久不久就有明星包場開Party，真係星光熠熠！
在嘉蘭中心，我就曾試過跟梁朝偉在商場玻璃門同時一出一入，佢望住我，我望住佢，幾乎畀佢對眼電暈。哈哈。
最搞笑一次係，有人話劉華在樓下拍戲，我話無興趣，唔去睇。放工前，有人講番劉青雲都在場拍戲呀。嘩。。我即刻埋怨同事講漏了重要的一個，白白錯過機會。不過，後來，幾年後，我在長江中心附近見過劉青雲。
從office望出去，十年間多了IFC，對岸西九的高樓，碼頭越搬越遠，維港窄了，ICAC都搬走了，富麗華酒店拆了變成現在的AIG TOWER。連麗嘉酒店都準備拆卸。。唯一不變是前希爾頓酒店就留下來曾被折枝折到慘不忍睹的大榕樹，到現在仍一樣慘不忍睹。「樽狀大樹盆」令樹根無法好好伸展，未來日子，相信大樹仍慘不忍睹。
至於長江中心內以前有間天山閣酒樓和一間餐廳，除了見過梅艷芳到過外，就沒有見過什麼明星。李超人和李公子和超人的紅顏知己倒是見過多次，每次都成班食蕉，戒備森嚴。
搬離了多年工作的環境，如果沒有不捨就一定是謊話。不過，人係要展望將來。
下星期，一切重新開始。