佛珠………會自然出現

話說我自年廿八開始上道場參加薈供共修等等至此一個月，共上了道場八次，可是我都係無108。雖然公司檯面多年來都掛住一條硨磲108，不過因為硨磲存放不妥好易變黑，加上幾重啦，放在公司又唔想郁佢，所以從無打算拎去用。即使在道場師父有叮囑大家每日都有佛珠跟身。我都係嗯嗯咁聽著，未有動心動力去準備。哈哈。

不過，有日公佈來緊一個活動要佛珠，沒有108 的我在翌日 whatsapp 跟師父講我沒有佛珠。

然後，他竟然回我這句玄之又玄的話：『佛珠…………會自然出現。』

呢句話之後我有「？」，但他可能很忙沒有再應機喇。

而呢句偈，每次睇返都好好笑。當然我有分享過畀同樣識師父但無跟他修法的朋友睇，他們都笑哂。

他們也講起自己的108 都係別人送的。我需要的話也可借我使用。❤️ 感恩。

點都好，先唔好奢望師父會送我一條108。唔好起個貪念先。雖然佢送過更珍貴的佛寶給學生。

自然的事自有上天安排。不過，我都扚起心肝，幾日後碌去老銅 Miss Lau 的店買條 108。因為可以在店上埋堂自己穿 108 嘛。當然，我可以問店主 Miss Lau 不少選108 的心得。

1/ 木珠，籽珠〔菩提〕定水晶 108 好用呢？水晶雖美，但好重，拎上手懸空撥珠的話，拎耐D都幾累啦。
2/ 我的手掌大，珠的大小是否要相對的大顆？
3/ 彈力線和沒有彈力線在撥珠上都有啥分別…

結果，我揀了最輕身的木珠，我跟 Miss Lau 說要帶紅色的木就可以。於是 Miss Lau 在貨架度找到這串 108 畀我。唯一的一條帶紅色，哈哈，就這個啦。

是印尼血龍木。

明明偏啞色，不過在燈光下好飽滿又耀眼。越睇越愛。

盛惠HK$80。

下兩幅圖係上完堂穿好珠跟手拍，一幅是 Miss Lau 的手機拍的，另一幅是我手機拍。好奇怪的色彩。哈哈哈。

Miss Lau有講，108 不必太花巧太奪目，減少別人望到而引起妒嫉的想法。哈哈，識我的朋友都知太招搖的事我從來唔做。而且，我是初學，純粹想有個角落安頓自己修行咋，所以沒想過要太誇張的108。所以越簡單的108 越合我心意。於是，我這串 108 除了隔珠用了較特別的紫心木〔紫羅蘭〕外，無隔片無卡子無記數器無金剛鈴無金剛杵。平實無華，即使日日戴在手腕也不會太惹人注目啦。

我要盡量低調。唔算矯枉過正吧。我都係想減少不必要的麻煩之嘛。

那天在店我有向 Miss Lau 訂多一條，桃木，唔上油的珠。貨到的話又去穿珠。呵呵。