學整手工香

早前去學整手工香。哈哈，其實係農曆六月時講咖喇，因為踏入七月盡量唔去太多夜街，所以過了七月十五至去上堂。這個是小班教學，得我和E兩個咋。在上堂前揀定兩款香，然後店主撈定兩包〔如下圖〕。我揀了「五木香」和「藏玫」。「五木」有邊五隻木我已失哂憶唔記得啦。「藏玫」就係藏香加玫瑰。

堂哩，其實只係教整香的方法，技巧和注意的地方，然後嘗試捏出香的形狀，珮香或塔香。兩包配好的香粉係帶走返歸自己做咖。點解，因為有一個步驟在堂上係唔夠時間做囉。至好笑係，上完堂又去睇水晶，結果搞到唔記得拎這兩包香粉走。要擇日再到店取，哈哈哈哈哈。

做香開粉，用水，或豪DD用純露。於是我去買了瓶玫瑰純露。真係落足料呀！

唔講以為我整緊朱古力。哈哈。下個步驟就係努力搓到佢粘成一團。

真係好似整餅咁咖，粉團要放室溫兩個鐘畀佢互相揮發。咁D成品至會香更多。

兩個鐘後，就可以捏香喇。

事先見另一位朋友仔在 whatsapp group 度上傳過其功課，把香捏得歪歪斜斜的，聽店主應機講，捏塔香的難度係高過餅仔。雖然點餅仔可以香多幾個鐘，但我都好想試塔香，好啦，就挑戰塔香啦。

掌握到方法，那團粉就捏出37粒塔香，加一粒餅仔。如何？似模似樣吧！哈哈哈。其實捏到手抽筋。哈哈哈。

幸運係這幾天涼又乾，放了兩天都沒發霉。風乾透之後，就把香入樽封佢一個月以上，就可用。不過那天到店上另一個堂，店主話我的香「躉大」，點的時候未必燒得到，咁呀…回去就拎出一粒試試先。

初點的時候燒得唔好，之後就順，可以點到底，燒哂。正。

店主有醒我方法，下回再整塔香，會整細D個躉啦。