HOWE

在厲鬼面書見到佢去了一間好似好正的餐廳。因為厲鬼係同阿桔同大廈返工，所以不如一齊去這裡食飯聚聚。說好的下星期，沒成事。反而後來有朝返工在大廈地下遇上，於是擇日不如撞日，下午便一齊去食食食。

這間店在工廈的頂樓，同時係賣家品。因為地方闊落，檯與檯之間真的有段距離，加上日光充足，好舒服，真係一個好好的聚腳地方。多謝介紹。

因為習慣了拍照不拍到同桌人，所以阿桔拍了這一張。

亦因為習慣不被攝入鏡頭，於是阿桔見厲鬼舉手機，下意識地縮開手和挪一挪身。不過厲鬼就話怎麼連手也縮開呀。

厲鬼後來傳給阿桔這照片。嘻嘻，拍不到腩腩，很滿意。

記憶中搜尋不到跟厲鬼飯局的記錄。以往出來都是幾個中一就一起的女生一圍檯咁，不過阿桔有頂唔順有尐人有尐事，積埋積埋就沒有再主動提議食飯，亦不想參與其中。。

今日好開心。 講下彼此近況，講下其他舊同學。厲鬼因為有兩個小朋友，而小朋友又湊巧跟舊同學的小朋友在同一所學校上課，所以有保持聯絡。而阿桔因為懶又好摺，所以即使在面書都有一堆舊同學，因為多年不見出來又唔知講乜好，所以都沒有主動找人飯局。

所以嘛。今日好開心。

後記：

阿桔中一就識厲鬼喇，花名緣起係因為佢在課堂常垂下頭把一頭長髮撥哂去心口閒時檢查有沒有開叉，加上佢性格飄忽，於是同學都叫她厲鬼。隔了這麼多年，到現在想起都好好笑。

這裡用她的花名沒惡意咖。純粹係這花名實在太特別。呵呵。