別逼我去炸鍋！

因為工作日日涉及錢銀支出運作及記錄，於是大老闆上年把一直獨立的我入了組。這個組，其實係要整理一年的  budget and actual expenses 。本來我只係按月畀料呢組人去砌個報告呈交畀大老闆，後來，有天，有個副監還煞有介事地跟我講大老闆說不如擺我去呢個組啦。而所謂煞有介事，是這個組的五丁，其實在部門不少人口中，甚至其他部門接觸過夾過工作的同事口中，都出名長期處於「平日他們在做什麼工作？」及「把簡單事情複雜化」的狀態。未入組前我都領教過不少這組人的辦事能力，平日都給這組中的人白眼。。可想而知，我當日接到聖旨的心情多惡劣。

工作效率及能力長期快靚正的，被安排對住豬一樣的隊友。。厄運一樣。

組內五丁，一件「智將」副監，一件吹水多過工作的人妻，一件總把事情拖拖拉拉蛇頭爛尾的中佬，智將另一條樹枝，就有一件連 expense claim 都呃被我揭發只好扮傻的叔叔及一個跟我扮 friend 的同事。

在這樣的伏味嚴重的生境中，這一年除了無啦啦頂下大量的文件及工作，幾乎天天陷入角力和自救中，因為每件經由這組三件智商夾埋唔過一百的散過來的工作，即使是文件，都有大大小小的陷阱，日常本要睇數睇錢，加下對住佢幾件更加要金睛火眼，否則賠葬了都唔知咩事。

點解咁勞氣？因為執了太多手尾！打份工，份糧係公司出，不是他們出的，為何一個二個三個說好命人生都剩得一半啦，在工作上還終日要其他人執手尾勞心勞力？

經典的實在太多。。

有次大老闆叫智將整 monthly expense report。智障在房唯唯諾諾完後，出來竟完全唔知大老闆想要什麼！於是 call 齊組員翌日去開會 brainstorm 研究點整個 report。佢走埋阿我個位講要開會之時，我被迫停哂手頭工作邊聽原委一邊心裡爆粗，唔撚係呀。忙到甩碌喇還要犧牲幾個小時陪三件白痴去會議室綑綁式地研究個報告點整！？而重點係，即使度掂點砌，那個 report 又係咪大老闆想要睇到的那款？佢分明係消化不到大老闆講的重點。

基於個 source 係由我在 system 度 export 出來再加加減減執好先交畀智將砌個報告，倘若有乜差池，我又要被要求再重做添加大老闆想要見到的東西。。加上智的思維及方向從來跟大老闆背道而馳，而預見開會也不會有什麼成果。。想到此，我還是直接走入大老闆房晤大老闆其實想要什麼規格及模式的報告。大老闆用 post-it 寫了四點給我轉達。我還問大老闆，是不是他以前整的那類似。我有舊檔，問了大老闆，他同意我畀一份舊檔過智將去參考〔謄抄〕。。

至於那個沒腦會，至少我沒有開到啦。

.\/.

而件人妻。。

我負責把 e-bill 寄到某國，因為那個國家有外匯管制，電匯要我們這邊填一份共四頁的表格過去那邊政府，那邊批准我們才收到電匯。本來智將叫我食埋呢件工作，我死都唔肯啦！這是一份交畀當地政府的文件，且具有法律約束力，有咩差錯真係死得，而且我的身份根本不是處理這敏感的文件。『說的也是』。這是智將對於我的意見的反應。於是，佢問了幾個部門意見後，卻無人肯上身，卒之搵左人妻去做。

收到三張賬單已兩個月，那邊一直不見三份表格，電郵詢問。

唔問猶可，一問，原來人妻未整未寄。。吹脹。

又隔了不知一個定兩個星期，那邊因為尚未見表格的正本，又電郵問一下。這次，人妻好叻，佢覆電郵話早已整好文件交了畀另一位同事去寄出。人妻還扮哂野咁問那位同事係咪寄了件。我看了文字含混，於是插嘴問用什麼方法寄。。普通空郵。。我沒有再在電郵中加把口。不久，智將回覆，叫人妻再整過那三張表格，寄．速．遞。

.\/.

我為乜咁勞氣？事緣早幾日智將佢把整了超過一季的 spreadsheet 畀我叫我開單畀外國的分公司。一共一百廿條左右的數，真係好黐線。。連日都忙到水也沒時間去斟去飲，再看了那堆 user unfriendly 的格式，已一輪粗口。理不到，擺埋一邊，因為日常的工作已密麻麻。

於是，星期五，畀個電郵佢 seek approval ，因為 heavy workload，因為平日 spare 唔到時間去處理呢堆單，要星期六回來做。智將的腦袋真的不知什麼構造，佢雖然批准 OT 〔if possible〕，不過，佢加了一句『not hurry，畀兩個星期你整好堆單』

。。。。 畀半年我都整唔到咖啦！我日日返工忙到死呀！

十幾年無 OT 喇，今次星期六在公司梳理呢張恐怖 spreadsheet ，發現好多錯漏，只好 cap 圖又 cap 圖加箭頭在問題出處 draft 好電郵掟畀佢問。星期六，盡整都係整左十張 bills 。。妖，都唔知點算。

七點頂唔住走。。趕去金鐘走轉。

火滾滾！