中秋特備節目

上星期三無啦啦開始喉嚨痛，滿以為睡不足的警號，多喝水。可是喉痛持續，到星期六已有幾聲咳。星期一早，因為咳到不能坐長途車，便去元朗睇，打算睇埋醫生就回公司，點之等醫生回診所其間，阿媽打來話佢要入院，於是睇完醫生只好回家，放低返工的用品，執住院的東西去醫院。真係錯有錯著。之前阿桔還在想去佐敦睇醫生好尐喎。

上星期舅父舅母帶了兩瓶酵素類果汁畀阿媽，話好有營養，在美國寄過來咖。還當場開了一瓶斟了一小酌給媽試。結果嘛，佢唔受得，亦開始喉舌唔舒服。因為今個星期要打化療針，所以有幾聲咳的於星期一早去了急症室睇醫生〔化療期間的病人如有身體不妥係要去急症室睇，不可胡亂睇私家醫生亂吃成藥〕。亦因為咁，醫生叫佢留院觀察。

因為咳嗽不止，阿桔回家後先吃了藥再出發去醫院。趕及午間的探病時間。去到放低毛巾水杯等等物事，講了幾句，又落樓去買午餐畀佢。拎到上病房，都差不多一點。之後，自己才去食晏及買定晚餐。回到家，藥力發作，攤落床睡得死死的。因為是感冒，晚上有人接力去醫院探病買飯，連床都起唔到的桔留在家。

消炎同咳藥水令人昏厥，明明吃了藥，卻咳得甘過未食藥，吹脹。第二日公眾假期，睡了一整個下午，連阿媽出院回家都理唔到。當然，早一晚已跟細佬講，感冒中，不便入去病房，所以叫他處理出院的事宜。當然，保持距離好點。惹佢感冒就麻煩喇。

星期三，回公司，下午再去睇醫生。今次去佐敦睇返個夾的醫生。吃了一回藥，咳嗽收歛了。真的睇醫生都要睇個有料到好尐。

至於那兩支「汁」。那晚回家時聽完阿媽轉述，再睇下那兩支汁，嘿嘿！美國寄來？香港無得賣？樽同紙盒的包裝皆印上好多中文字喎！由成份到飲的方法都有中文正體說明。阿桔話，如果美國寄來，根本不會有大量中文字啦！再上網搜尋，喔！傳銷飲品。

以阿媽食多少少薑都過敏發紅的身體，幾好的幾有益的都未必受到。

朋友聽阿桔講了大概，說，化療期身體弱，唔受得啦！

無論如何。都出了事。

大家的中秋都泡湯了。