傑志對曼聯

萬眾期待的英國四支英超球隊竟然幾日內先後來港踢波。簡直開心死本地的一眾足球迷。因為飛貴加上事實係阿桔無睇波，為免浪費千幾二千去睇一班阿桔根本說不出名字也不知多厲害的球員，所以門票開賣時沒有舉手撲飛。

雖然無入場睇波，可是平日排隊都未輪到阿桔可揀電視睇的星期一晚上，竟然有得睇這場比賽。八點半沖完個涼出來後，阿媽竟然出手主動拎起搖控轉台，豪畀阿桔播波。哈哈哈。

於是，阿桔有得睇傑志咯。是的，睇傑志。港甲頻道用 low tech 機拍球賽，今次大婆台出手，果然畫面正好多！

上半場未完已吞了三蛋，嘩！唔係真係想追平南華嗄嘩？真係抹汗。實力係有距離，你知我知球員知，但，輸人勿輸陣，若見到自己友落到場亂哂陣就未免太失禮，會被藐爆囉！幸好，不負所望，驚喜是新教練竟這麼快就跟球隊接軌，二是上場的新舊球員也配合到夾得到，三是整隊人有心有力落場踢之餘，竟爭到兩粒入球。場內一片爭氣波的快樂，即使在電視機前，也感受得到。

波，笨唔係一個人踢，或只係為造就一個球員成「球星」而踢。在傑志，看到團隊精神。

期待新球季很進擊的傑志！

至於個球場草地。。咪以為阿桔馬後炮，阿桔初入球場睇波就有好奇過，問過，了解過球場草地的事。問睇波友會問點解球場的草有兩隻色，點解尐草唔青又唔密，點解塊場草甩皮甩骨。見到水浸的場會替變成泥鴨的球員擔心，見到沙塵滾滾的場又匪夷所思，不是泥土嗎？亦親眼目睹過本地球員因為踩窿而拗柴！唉，話哂入大球場睇波多過一年搭的士次數的阿桔，真係從未見過塊地此時此刻可以爛成咁。無落雨的日子，球員熱身後草地已是薯仔田，草地可中塊塊踢起，個場一個個洞，要人手執回草皮塞回個窿度踩實。。現在好啦，又濕又爛到似未插秧的稻田，終被正名為一塊 killer pitch！

所以，那天傳媒問球場經理黃應鳴，從他的一番胡扯，真係睇到阿桔火遮眼！火滾滾！真係乜架都畀佢丟清！

黃經理，除非真係有靈魂長期出竅的功架，平日係「徒得個殼」返工，否則，怎會不知這幾個月來香港其實已持續的有暴雨雷雨？而且，全港都一早知有世界級的球賽要在他管理的球場進行，為什麼在本地球季完結後不好好做點保養草地的措施？即使一個農夫，知道天氣變壞都會用大膠布把農作物及農田覆蓋以免雨中沖壞田地浸死農作物，可是分明就是失職的負責人竟然面不改容厚顏推說是天雨壞了場地，大言不慚，真是太膠太柒太扯了吧！他既然無能力做得妥自己的份內事，就讓路走啦！妖！

莫非本地球隊未能踢出彩虹，場地代表在管理球場方面就可以得過且過？咩態度！

明白無得比，可是在看 Desso GrassMaster 的成品，真係覺得香港的球場確實係爛地一塊！

爛又要威，香港政府團隊在呢方面真係無得輸。