在國際廣場吃一餐日本菜

幾個月無咬過日本菜，癢癢的，於是又再出動。左度右度，放棄要行來行去的自助餐，揀了iSquare 28樓匠伊兵衛食晏。舒舒服服，還可以食景。而且，天清喎今日！

無訂位，仲要係第一組入場，竟然有窗口位坐。真係正！

佢話，未試去開到咁高的食肆咬咬。

點了一客雜錦魚生定食〔HK$130〕，一客壽司定食〔HK$170〕，還加一個自家制凍豆腐〔HK$80〕。

然後，佢一邊啖著豆腐的豆香，又說：『未食過賣成80元的豆腐！』

雜錦魚生定食砌得好靚，加上窗外陽光，真係feel得到鮮甜。不過，對蝦眼好似怒睥緊我倆，所以被放埋一邊收埋。

至於個壽司定食，無諗過有11件壽司咁多，所以上桌時見到這個大堆頭，還有一碗烏冬、3件天扶良及一盅蒸蛋咁full都好開心。

魚生刺身都好新鮮，又沒有在雪櫃放太耐，入口仲係暖的。。奇。

一定要讚，係我覺得個蒸蛋超好味又好滑，是我食過日本菜以來「最得」的一碗蒸蛋。後來跟位熱愛入廚的同事講起，同事話可能在蒸蛋加了 cream，所以才會咁滑。真相係點就只有店子的人才知，不過，這個蒸蛋，真回味無窮。

呀，還有像jelly甜品一客。