康年的豬手。
上回成隻上，呢次斬件起骨上，方便進食，賣相也唔差呀。
堅好味。
19.4.19
安柏娃
一個月一次的繩結班，造就我一個月來一次吃泰菜。呵呵。
呢日在店遇到一個皮膚黝黑，留著長黑白鬚，整體個look好有油麻地道士感覺，加上左一袋右一袋的坐在店裡。不久，他從袋裡翻出幾百頁紙厚的英文文件在揭〔無folder，好raw〕。咦！
「嗯，不知是什麼工作呢？」坐在鄰桌的我在估量。
原來他在等人。來的人跟他一邊喝酒一邊聊，才知他是工程公司的阿頭。那幾百頁紙是他需要由頭刨到尾自看有沒有不明白的費用呀條件呀等等。
哈哈哈。
去食肆的快樂，就係會遇到奇妙的人和事。
《雲空行~貳》。10/19
01/04/2019。
故事繼續係主角雲空尋找知他前世的人。不過書被面有其他人爆了他的前世，真係睇到起哂雞皮〔疙瘩〕。好耐無試過睇故事會起雞皮。
好緊張。。
五月會出第三。極期待。
18.4.19
17.4.19
日日櫻
好耐無拍過花。呢日去九公做廁客，路過花圃就拍下花吧。日日櫻正開得燦爛。
賞花又想起樹。之前曾拍過屋村幾棵大葉榕換葉的盛況，今生不再了。因為上年山竹把那當風位的幾棵大樹，連苦楝都連根拔起。。無哂喇無哂喇。嗚嗚嗚。
《雲空行 壹》．08/19
04/03/2019
是一個非常緊張又好看的故事。估不到是廿年前的作品，近月由作者再重新修訂再發行。完全明白廿年前的張草的創作爆發力真係驚為天人。
舞台是北宋，主角雲空乃一名四海為家的道士。由他未成道士前的出生奇遇〔帶著很厚的業投投胎，出生那晚百鬼夜行〕，到後來成了道士周遊四方既為了生活也為了追尋前世的事，於是遇到人、非人、妖、怪、精、靈…甚至…
還有道學、易卜、佛學、蠱、醫術…真係好爆。
推介。
16.4.19
《影子》．09/19
06/03/2019。
by 安徒生
因為書腰印住「影響村上春樹的一部安徒生作品」，於是科水買啦。
故事唔長，好好睇，寓意也深遠，不過個結局實在出乎我意料之外。無心理準備就咁完結。
15.4.19
和味生滾粥
在油麻地，想食炸兩，就入了呢間老字號食食食。。點之是日無開粉，無炸兩無腸粉，得油炸鬼咋，都好啦，反正人都坐低了。
望著牆上的菜單列表，好多魚類部位的生滾粥，從小食魚搞唔掂魚骨所以只吃魚生的我，就叫艇仔粥諗住最穩陣。哈哈哈，正宗的艇仔粥係在艇上面食嘛，何來豬肉？結果，一碗好多小魚片的艇仔粥就擺在我前面。
好驚呀。我試過插魚骨落牙肉，我舌頭唔識分開魚肉和骨骨咖。
真係自我大整蠱。哈哈哈哈哈。
SERUM
家中的 serum 用到見底，朋友推介 The Ordinary 抵又好用，於是急忙上網訂啦。
無serum 幾日後，終於收到貨。四瓶。咁多。
哈哈。當然，買開就買埋其他野。。我也試埋 Revolution 先。話哂產自 LONDON 嘛。
呢瓶 Fruit Oil 係橙色咖，我搞到變橙面人喇。唔小心滴落衫都一個漬，洗唔甩…大檸喇。
延伸：
Revolution - https://www.revolutionbeauty.com/
The Ordinary - https://theordinary.com/
14.4.19
買 碎 / 定妝 粉
之前買的定妝粉唔夠好用，到後期盒粉有顆粒狀。都係買返 Chacott ，因為用年半都 keep 到盒粉是幼滑沒有顆粒。不愧為舞台表演者至愛。
講你知，皮膚唔好的我，覺得好用的 product，就真係好好用咖。哈哈。
咁，見網店推介 Orbis ，就順便買埋來試啦。
女生就是這樣嘛。
延伸：
Chacott - https://shop.chacott.co.jp/
Orbis - https://www.orbis.co.jp/
12.4.19
《第歐根尼變奏曲》．06/19
12/02/2019
撲到簽名版。。而且，重點係量產的線裝書版。
陳浩基的作品非常有睇頭，扭橋扭得好犀利，睇到好緊張好刺激。
呢本。。犯罪推理，推介。
期待下一部作品。
香料貓
師父表示要買些甘草粉，雖然我有找朋友留，不過近日我又無過海，買唔到添。
趁人在油麻地，去返百年老號度買啦。
清明那天摸了一次門釘，呢日來到，閘也拉下，幸好老闆見我望下望下問我係咪有東西要買，於是我順利買得三包甘草粉。
然後，門外有貓，我看來是阻塞通道牠入不回舖。於是，稍稍移開後，牠就跳回舖內。
牠可是努力工作值得尊敬的好店長啊。
當然，我之前拍過牠啦！那次牠伏在櫃面上睨著我嘛。呵呵呵。
11.4.19
訂閱：
文章 (Atom)
