二月廿七．中尿毒

這晚本來阿桔去睇BC套戲。老銅，八點開場。搣了票去埋洗手間準備入放映室拎出手機檢查有沒有調到震機，就見到阿媽曾來電。她留言說蛋蛋不妥，應該要看醫生，叫桔打去診所預約。嗄？當堂嚇到心跳慢了一拍。打回家問，媽說蛋整天沒有上廁所，而且也不吃罐。軟趴趴的。急忙打去診所問翌日時間，診所說最快都要傍晚六半。桔說貓年紀很大，可不可早上抱過去，診所話約滿了。不過，診所說九點左右有空檔，可不可以抱貓來。『我在銅鑼灣。。』。

為了不想再白等多一晚，所以打回家問媽個人狀況方不方便即刻帶貓過去診所。於是兩老就帶了貓去診所。同一時間，阿桔通知細佬，幸好他有空亦在家，便叫他去診所幫一幫忙。而阿桔，就沒有入場睇戲，慌失失由時代上的士去上環再即轉巴士回元朗。擔心到眼濕濕。

因為細佬傳了這張相給桔：

只係行開一晚出街，貓就搞成咁！

半小時後去到診所，貓己看了醫生，放了尿，大家在等牠的驗血報告。牠的症狀和報告出來，中尿毒，血糖指數都好高，要留院。

見牠入了病房之後都算係精神，重識得坐起身，心情才放緩。

實情是，在診所對住阿媽係「著了火」。成日咁長，阿桔要返工，貓的事就只能靠她看顧。見到貓日頭已有不妥為何不早點通知阿桔，阿桔可請假回家照料貓。為何係要拖到差不多八點才打過來？佢知阿桔出街，五點通知，阿桔都可以取清活動，早點約醫生，放工直接回家，不必由九龍東出到銅鑼灣又要折返入新界西。

如常，阿媽又搬出似是而非的理據。唉。前年四月，阿蛋被發現有糖尿那次，阿媽見貓不妥〔不吃罐〕又不張聲，去完街回家貓繼續絕食只喝水就打電話畀桔告之貓有異樣，叫桔打去診所約時間。〔因為阿桔不想貓不停吃罐，所以阿媽在家的話阿桔係不會開罐畀貓。〕你知道阿桔當時在哪裡嗎？就在塱原裡的田畦間。結果到了塱原沒多久的桔，又要趕回家。點解出門前不寫幾隻字留話說貓有不妥呢？激奀！

呢次，回到家，見到廚房有杯碟，明哂。原來曾有訪客。

唉。

算，都係以貓為重。