無處可逃

上星期阿媽話佢心口驗出有腫瘤，醫院說要化療，人生又開始忙碌又緩慢起來。

上星期和弟三人在醫院坐了半日，見腫瘤科醫生，見心理醫生，抽血，驗尿。翌日拎住轉介信到醫院排隊揀出面的中心去做掃瞄〔醫院個期要等兩個月喎〕及驗心臟。跟住打轉介的體檢中心查詢預計取報告的時間，再打去醫院更改原本早過掃瞄日的覆診時間，抽血時間，見藥劑師時間。下星期末見醫生，就開始進入半年以上的化療期。醫生說，到時看病者的狀況而定手術日子。

那天見心理醫生，醫生見到病人和家屬，都說大家很冷靜。

病人不是第一天知道有事，早已消化了事實。而作為家屬，要兼顧及面對的事太多，那來心情去傷悲。以前係人老多病，現在世代，人未老就多病了。面對疾病，人總是被動的。

當下，要處理的事實在太多了。

是病人還是家屬，過來人一定明白，在醫院耗在等候的時間是漫長得可折磨身心。而且，當知未來還有漫長日子一樣要在同一候診室等見醫生，事實真的令人越加鬱悶。不是晦氣話，只是阿桔到現在仍要隔大半年去醫院覆診一次見見醫生，每次都等上幾個鐘，不敢胡亂走開，想去個廁所都要急急腳，又唔知醫生會對自己講乜，真係話無壓力係呃人囉。

阿妹想幫手，阿媽同佢講佢要湊仔又要返工，好忙，不必為她頻撲，放心，有家姐同細佬幫忙得了。阿桔聽到這一句真係灰哂。阿桔不是鐵人呀！在公司常常忙到甩碌咁滯，平日回到家都盡量畀個腦休息無無聊聊啦，現在還把大半擔子交到肩上，真的暈得一陣陣。

還得把更新的資料傳到細佬妹知，好分配時間，不必事事都一齊列席。細佬幾天來不停叮囑阿媽呢樣那樣，噓寒問暖，但面對著醫生，又有點唯唯諾諾。雖然他說了下星期由他陪阿媽去做掃瞄，但阿桔還是在先打電話去詢問了掃瞄過程如何，又再上網找補充資料，再交帶後事一樣把要注意的事一一講畀佢倆聽。。真係怕有佢倆有甩漏。事緣見醫生那天，醫生對著我們三人講轉介出去掃瞄的手續要翌日去醫院日間診療那邊櫃位排隊搞，他倆竟一齊聽錯說醫生話打電話去就可。。

是的，還有照顧貓的工作，未來日子又再多了。

朋友叫阿桔要保持身體健康，唔好冧廠。這間屋有兩個六十歲以上的人及一隻天年貓，當中兩個係有病患的。。阿桔病埋就真係嘿嘿嘿。

早兩晚，兩個老人家食過飯就睇電視，其間阿桔去沖涼，跟住開壇熨衫收壇，整理阿媽的各項覆診時間表，幫老豆填老人金的表格，餵貓，幫貓打胰島素，開埋電腦上網。。呢兩位還未捨得去沖涼。當時已過九點半。接著，兩人開始你沖先你沖先啦推推讓讓。阿媽突然話要洗埋頭。繼續你先啦你先啦。。阿桔忍不住問佢倆係咪要搞到十點半兩個都未沖好涼去睡覺，〔不慣吹風筒〕阿媽做乜要搞到咁夜先去洗頭。才急急腳入去沖涼，另一個去洗杯執拾。真係勞氣。

這只是部份的事實，阿桔不會講畀細佬妹知，反正講來沒意思。

在這非常時期，高度的自律係好重要囉。

真的。。嘿嘿嘿。

睡得不好，攤落床眼光光的，頭又痛了幾天。幸好這兩日無再痛。

返工又煩又繁忙，回到家也大把工作，真的鐵打喇！