那一刻劉華出現就好喇

終於有時間去髮廊執一執把頭髮。。怎料，遇上件不爽的理髮師。

理：你想點剪？
我：兩邊要長過耳，前陰要剪短，不想戳到眼。
理：你兩邊剪太短的話唔好睇喎。〔她看了我的大面分析著。這個我夠知啦！〕
我：咁你拿主意剪啦。
理：咁其實你想剪個怎樣的髮型？bob、剪碎。。
我：無所謂，只有兩邊要長過耳，前陰要剪短不及眼眉就得。
理：唔會無所謂，你點都有個髮型想剪，無理由求其無諗過想點剪個咩髮型就上來剪。。你應該諗過自己想剪咩髮型。
我：。。。〔整你個掣！我咪講了「兩邊要長過耳，前陰要剪短不及眼眉。」囉，講完又話唔好，倒頭來又問我想點剪。。仲講到係我無諗過度過就上來，錯哂咁。。髮廊價錢表上比剪髮貴的「剪髮造型」究竟係咪得個「名」實情係無呢件事咖！〕

之後，呢位阿姐一邊剪，佢一邊對我問長問短，因為剪髮前我整了頭皮護理，所以佢問我平時怎樣打理甩皮的頭顱，我咪話因為咁不常去理髮店，因為每回整完後那些洗髮用品都令頭皮問題嚴重，而且潮濕天氣都會令問題反覆，自己都覺礙眼又怎可能上理髮店。。之後佢又問我有沒有打算留長髮，我說留過了，不會喇。咁佢咪問我留長髮留到幾長，我咪答佢試過長到腰囉。。點之佢竟話我「咁又唔使留咁長！留咁長都唔好睇。。」〔都話十幾年前啦！〕

。。

然後，佢又問我有沒有電過頭髮，咁我咪答佢有囉，電到好鬈不太鬈的也試過。當佢問完我電到幾鬈之後，又突然話我「點解電到咁鬈！？」

我：我唔想咖，係意外。
理：你唔係要揀個合自己的鬈頭先電咖咩？
我：有咖。不過都話結果出來是個意外咯。
理：咁你無睇過相片揀清清楚楚先電咖咩？
我：有，但係睇款式跟實際電出來係兩回事丫嘛。

唉，我只不過剪過髮而已，點解變了一個犯人慘遭批判？而且，作為客人，我沒必把以往紀錄給她說得太詳細。奈何條粉女半解半知就「以言入罪」來把我的事變成大罪落鑊煎。我來剪髮咋，不是來被查家宅，點解講到件件事都係我錯哂！？沒有發作寸佢，皆因佢拎住把剪刀，皆因我不想無端跟人嘈交破壞了好心情，儘管我的好心情已被呢條粉女搞到連連受挫受狙擊。唉。

那一刻，如果劉華出現跟呢條友講一聲『今時今日咁既服務態度係唔得咖！』我一定即刻奉劉華為神明。可惜。。可惜。

匪夷所思，是她又好認真咁幫我諗解決頭皮多的方法，還當我係無知女人咁教我點樣用理髮用品。。〔有十多廿年頭皮兼睇過醫生塗過藥膏我又怎會不知理髮方法喎。〕雖然我一早就知，但仍禮貌地一邊聽佢好意講解一邊點頭唯唯諾諾。

講真，那間髮廊有我想試的某牌子頭皮treatment，而且環境很光很淨，我真係好喜歡咖，可惜，我真的不想再見到那位神經的女髮型師。