反高潮

星期二大醫生巡房，問我學了上落樓梯沒有。沒有，由的士站到家中都不會經過樓梯。不過醫生認為學了才妥當。我當然又問他幾時准我出院。醫生話我學好了上落樓梯又如無意外就星期四巡房時批我出院。不知何解，我哦了一聲就停頓了反應，感覺上醫生的話有點怪怪的。大概我見到他盯著我新拍的X光片良久令心情抽緊吧。也可能不是即刻出院，導致心情有點失望吧。畢竟，一日仍呆在醫院，當中變數真係大到計唔到。太多想法了。醫生都發現我突然反應遲鈍，即刻問我『唔捨得出院呀？』

不是啊醫生。病房裡的院友、護士和職工等等知我快可出院都替我高興哩！

於是，乖乖支著拐杖跟物理治療師離開病房到後巷的樓梯通道學上落樓梯的技巧。在醫院時間多，於是乎我一條友又再去後樓梯處努力上落練習。。物理治療師經過見到我一個人在樓梯附近的長椅上毫無儀態的休息發呆，沒有讚我好學生，反取笑我搞到成個孤獨老人咁。。不過，他都叮嚀我小心。〔笑〕

星期四醫生巡房，心情準備好回家去的我竟然出唔到院。醫生對比了手術之後拍的X光片和第二次入手術室打石膏後再拍的X光片，發現我的手掌骨有下陷的情況，後果咪係以後都郁唔到手掌囉。於是，他決定趁未定型未為時已晚時幫我拗骨。若 Option 1 拗骨 fix不到問題就要即刻開刀鑲支鋼針〔後來我問物理治療師那支鋼針有幾粗，他便掏出原子筆芯給我看〕去固定手掌。。這個，真係暈得一陣陣。知道又要入手術室，還有可能再開刀，再打針吊鹽水，更加唔知要待到幾時才真的出到院。。。要想的唔想的都一一湧現，冒汗發燙。。

臉如死灰。。醫生及巡房的隊伍散後，我沒勁的靜，有院友直說『30，你很不開心呀，唔好唔開心啦！唔好想太多喇！』我沒有唔開心啊！只是對這個突發的反高潮覺得很無奈。身心頓時招架不住。空白一片。

只是一片空白而已。空白會令人更累，眨眨眼，很快就去了周公子度調整心情。

睡了幾個小時，心情已平伏，泰然接受事實。附近院友見我睡醒，又紛紛安慰我。連護士和病房護理員工都走來安慰我，話既然放緊病假，咪安心畀醫生搞好佢囉！趁早搞好佢啦！醫生又唔係唔理我。。

對。

謝謝各位對我的關愛。