從朱處長講起

朱處長飲酒飲到要走，從報章上看到，他在記者會說「這個是朋友聚會，這些朋友是經常見面，甚至家庭成員一齊經常見面。。好多年都是這樣見面，朋友之間的聚會，大家各自付費。」

齋睇呢段，已經超級爆笑。我諗佢記者會前真係無諗清楚要講乜。。或者，可能係佢好好清楚要講乜。話語中的潛台詞呀，言下之意呀就大家諗啦。
〔括號內是我所想到的〕

這個是朋友聚會〔點解朋友的聚會有Coco在場？〕，這些朋友是經常見面〔咁呀Coco 係咪其中一位朋友呀？如果唔係朋友，咁經常同朋友見面又點解有Coco在場？朋友的聚會地點通常係呢種場所？〕，甚至家庭成員一齊經常見面〔除了家庭日大家聯誼一下，這班雄性朋友就會撇底妻兒一起去玩。好《大丈夫》啊！究竟邊個先係損友？作為同朱處長一家有來往，有見面的朋友，自然會對號入座。。不，係處長故意定無心擺埋佢地一個二個上檯？如果我係佢朋友，都幾「抹汗」〕。。好多年都是這樣見面〔仲要驚嚇你唔死咁提出「好多年都是這樣」。呢種「聚會」真開心哩！維持了幾多年？〕，朋友之間的聚會〔我重申再提出疑問，點解朋友聚會點解會有Coco在場？〕，大家各自付費〔呢句係講畀簾記聽，不過太此地無銀喇〕。

咁，貴為處長的朋友，本身又有家室，家庭間久不久又會出來短聚聯誼一下的，會否因為處長這一番「真心話」而搞到要避嫌不見？

天涼好個秋，處長走了。。但，我想，因為這是他和朋友們經常性的聚會，所以日後他縱使是個每月拿著八萬長俸的普通市民，想必還是會熱烈地參與這樣的「聯誼活動」，舒展筋骨，檢查「健康」。正所謂唔滾唔知身體好，天涼好個秋。

昨為一個處的處長，理應見慣世面，面對過很多大大小小的風浪，人生充滿歷練，衝破路障。可是今回一次又一次失常失措失準，真係羞家。。當日，佢應大方地拍照，之後再強調呢位麗人『真係我朋友』。貴為一處之長，浮沉社會數十載，自然識得不少來自五湖四海的朋友。咁，朋友堆當中有個來自四川又係午夜麗人的，有啥出奇唧？大家少見多怪，做得朋友就唔會戴有色眼鏡去歧視友人的職業啦。嘩！多義膽雄心呀。

Alcohol is not inductive to good behaviour …出了事先講，前張處長還寬慰撐朱處長呢個人「還是見得人」。。唉。公還公，私還私，可是一句酒精累事，就可以輕描淡寫抹去他嫖娼的嫌疑？雖然佢話這個只需對妻子交代。。雖然我本人支持娼妓合法化，可是，張氏既是一位女性，對一個已婚的男性被人捉到夜拖艷女還龜縮在艷女身後百辭莫辨見不得人？重要的是，認召妓係無罪咩？

記者又為什麼要逼供佢認呢？反正，佢話無都無幾多人會相信啦。

簡直越抽越黑。

可憐那「鐵竇」。。呢期邊有社會知名的人士敢去呀？

職場裡面，我們同樣成日會遇到「咩人做咩事」，「咩人諗咩野」的情況。辦事前分分鐘個腦都唔知有無用過。