In & Out

部門將會換地毯，工程浩大如搬Office。每個職員都要把檯面檯底的東西塞進大膠箱中。好讓工作人員移檯蓋新地毯。。趁假期，先回公司「解決」檯底積存如堆填區的雜物。同事T問我怎解決，嗯，只好「扔得就扔，掉得就掉」，盡不盡力都要做。

經過過年前執睡房的經驗，今回決心把不用亦應該不會再用或是「無眼屎乾淨盲」唔想再畀我見到的東西統統丟進垃圾箱。8年來積埋積埋的「狗屎垃圾」今勻一次清除，真幾乎要了我條老命。

一邊執，一邊尋寶。竟然搵到：
100%全新絲襪3大對。
小說散文等書籍一箱約十多本。〔未暇研究睇過未〕
證書班畢業狗屁不通論文一篇。
舊座檯月曆數個。
唱片3張。
書法班用品一袋。
課堂筆記數大疊。
大小玩具。
零錢。
貼紙。
利是數封。
舊雜誌數十本。
化妝品宣傳單數十封。。
背囊友用背囊一大個。
腰墊一個。
。。
。。
垃圾兩大箱。。
。。
鬆弛熊精品數件。鬆弛熊是我近呢3年比較喜歡的icon。。不過除了座檯月曆外我都好節制，不會亂買。不像以前膠擦記事簿膠公仔海報鉛筆一大堆一大堆咁買。

對啊，人會變，以前喜歡過布甸狗，Post Pet，大口仔，Miffy，細菌小子。。不過好多都係好耐好耐以前的事了。老實說，這兩年再收到這些數年前曾「時髦」過的禮物，都忍不住擺出「唔係呀化」的要命表情。。再放埋一邊。

我想在物質超豐富的香港，很多人都是這樣吧！

心意還心意，餽贈人家的禮物，很多人是「求其」咁買。。或者，買的人根本不知受的人喜歡什麼不喜歡什麼。

今日在檯底搵到份打開一睇忍不住「唔係呀化」的禮物。Shit！見鬼！新年流流，大吉利是。

〔火光熊熊中。〕

新簇簇，丟又唔係〔覺得好浪費〕，捐出去又無人要，唔丟又得個「收埋入櫃雪過幾年又幾年」的情況下，相熟的友人都不會亂買禮物送畀我。。

我也如是。

也許，看了《東尼瀧谷》的關係吧！

呀！全新布偶係咪可以捐畀慈善機構咖？