星期日的杏仁蛋白

趁立夏之前，星期日湊巧宜沐浴，於是一早帶阿肥仔去廁所沖個靚仔涼。埋數，佢都有2年無沖過涼喇，日日有用熱毛巾為牠抹身洗面其實佢都唔算污糟咖喇，身上亦沒有臭味。可是長毛小朋友有個隨地碌完再跳上床碌的天性就令我們困惱。在假期間此貓就跟我發生了如此的一個「吹脹」事件：話說有晚我出完街回到家中，就見到阿長毛在地上「典來典去」，身上還有幾粒佢腳指罅從砂盤帶出廳碌到再黐上身的砂碎，於是咪叫佢污糟仔唔好在地上「典」囉。雅興被掃貓不滿地喵了一聲便散場起身帶著幾粒貓砂走開。待我洗完手回房才發現佢原來已跳到我床上碌緊。。囧。。

性格使然，呢隻仔勁唔鍾意沖涼，每次一濕身先是默不出聲乖乖企好，躁底的被皂水毛巾捽多幾捽夾佢轉左轉右後就開始鬼上身，不停怪叫發癲地用蠻力掙扎要走，次次沖涼都搞到個場面宛如「屠殺大會」。真係好驚鄰居被這連綿的慘叫聲誤會我們這家人關門幹著什麼不見光的壞事。

嘩，因為阿媽拿了支KIEHLS洗頭水為肥仔蛋沖涼，所以沖涼儀式完畢我用大毛巾接過肥仔蛋時嗅到牠一身幽幽杏仁味，呀！變了白杏仁蛋〔或杏仁蛋白〕！不過杏仁蛋白似乎不太抗拒一身杏仁味，以往用動物專用的沖涼液，風筒吹乾後佢會用舌頭舐濕哂身上的毛。今次完全無發生類似事件，任得身上杏仁飄香。哈哈。

喔，不想拍到張張照片都「杜可風style」，可是當時肥仔真係太瘋狂，而本人部平價相機根本無法在水花四濺的狀況中深入戰壕捕捉佢左吼右嘶目露凶光的清晰影像。

折騰個幾鐘後，人和貓都無哂戰鬥力，呆呆滯滯，遂各自偃旗息鼓，收皮。

早幾晚看now介紹寵物專用乾風機，個外型好似戲院的爆谷機咖。不過我家的狂噪小子，應該用不著這部機。。因為放佢入去必定嚇到佢亂撞亂叫。。燥火飊昇！哈哈哈。

嬲嬲的眼神