通常哩，走去學睇相，睇八字，卜卦，紫微斗數的，唔多唔少因為在生命中都遇上麻煩事才想去知多點玄學的事。朋友話齋，生活順順利利又無病無痛的，不會刻意想知想問。
上堂時，大家把搜刮到的八字寫到白板上大家一起計，然後阿 Sir 就補充大家睇漏或睇錯的地方，之後哩，就由掟八字出來那位同學講返這個「cases」的真實人生如何。這十二堂裡，見過冤獄〔老闆因走私著草公司職員悉數被某地公安拉哂入牢強迫吐露老闆位置最後靠一筆錢才獲釋返香港〕，破產，死老豆老母，大病，自殺，反叛，唔讀書，無業，被下屬出賣，奉子成婚，離婚，吵吵鬧鬧，第三者，第四者，宗教人士……等等的 cases 。而這些，統統都係同學認識的人。
我明，人一生唔會順境一世，阿 Sir 在堂上常問大家，想好運在童年，盛年定老年？天干地支，十年一次的大運，早有所示。
因為初學的我計唔掂自己的兄弟姐妹數，加上那朝被個女鬼似的同事嚇到唔見七魄〔我晚上上堂入大廈在 lift 見到阿 Sir 竟然同佢講『早晨！』〕，所以那堂，便拎我的八字出來算。阿 Sir 當然計到我的兄弟姐妹數啦。呀，係呀，阿 Sir 係有教我們計兄妹姐妹數。這個數係承父親那邊，是男人命中注定的仔女數，跟娘親無關係啦。連夭折的，流產的，落左的都計。不過嘛，呢個年代，男人即使搞大別人個肚，作為當事人都未必知啦，不過，如有天男人膝下有兒女，再拎堆八字出來計，就真係哈哈哈喇。
至於點解我計唔掂，點解那朝撞邪，一來係我愚笨，二來，我的八字比較煩又複雜。於是，阿 Sir 就用舊派新派各講解一次。用舊派的話，唔準。而新派去解，全中。他說呀，我細個係一個非常唔開心的人，好唔開心那種。而且，跟老豆關係好差。我好多心事，胡思亂想，內在情緒起伏好大。阿 Sir 真係咁講。Oh God！之後繼續講的都中，這裡不贅喇。
他特別叮囑我，每天一定要有紅色東西跟身。我R頭，因為平時返工真係無乜著紅色。同學叫我著多些紅衫紅褲呀，我哈哈回應『麥OO咩！哈哈』，「咁轉哂紅 bra 紅底啦。」。真係要諗諗。
結果嘛，我早前染的紅頭就係因為這事咁來的。
待續。
/\/\/\/\/\/\/\/\/\/\/\/\/\/\/\/\/\/\/\/\/\/
即係咁，我本身成日好多奇怪問題想知，所以在堂上會趁機問埋好多古怪問題。希望把記得的盡量寫出來。
例如咩問題？哈哈，我有問阿 Sir 有無咩八字的人會成日見鬼。而阿 Sir 真係有確實答案哩。
